Áleýmettik mańyzy bar azyq-túlik baǵasynyń ósý qarqyny tórt ese baıaýlady
ASTANA. KAZINFORM — Qazaqstanda áleýmettik mańyzy bar azyq-túlik taýarlary baǵasynyń ósý qarqyny ótken jylmen salystyrǵanda tórt ese baıaýlap, 18 maýsymdaǵy málimet boıynsha ındeks 7,3 paıyzdan 1,8 paıyzǵa deıin tómendedi. Bul týraly Ortalyq kommýnıkatsııalar qyzmetinde ótken brıfıngte QR Saýda jáne ıntegratsııa mınıstrligi Saýda komıtetiniń tóraǵasy Ernur Jaýtyqbaev aıtty.
— Jyldyq azyq-túlik ınflıatsııasy besinshi aı qatarynan baıaýlap keledi. Eger 2024 jylǵy jeltoqsanda bul kórsetkish 13,5 paıyz bolsa, bıyl mamyrda 10,7 paıyzǵa deıin tómendedi. Al azyq-túlik taýarlary baǵasynyń aılyq ósimi 0,4 paıyzdy qurap, azyq-túlikke jatpaıtyn taýarlar men aqyly qyzmetter baǵasynyń ósiminen tómen boldy, — dedi Ernur Jaýtyqbaev.
Komıtet tóraǵasynyń aıtýynsha, baǵany turaqtandyrý úshin búginde ınflıatsııany tejeýge baǵyttalǵan 93 is-sharany qamtıtyn keshen iske asyrylyp jatyr.
— Eýrazııalyq ekonomıkalyq odaq elderindegi baǵa dınamıkasy, álemdik naryqtaǵy ahýal, syrtqy saýda sheshimderi men logıstıkalyq faktorlar turaqty taldanyp, aldyn alý sharalary qolǵa alynýda. Memlekettik baqylaý da kúsheıtildi. Jyl basynan beri áleýmettik mańyzy bar azyq-túlik taýarlaryna belgilengen saýda ústemesin asyrǵany úshin 2 247 ákimshilik qaýly shyǵarylyp, 63 mln teńgeden astam aıyppul salyndy, — dedi ol.
Óńirlik komıssııalar 2 070 ónimsiz deldaldyq faktisi men saýda ústemesin asyrý deregin anyqtady.
Budan bólek, mınıstrlik elektrondyq shot-faktýralardy taldaý arqyly zańbuzýshylyq táýekelderin anyqtaý jumystaryn jalǵastyryp jatyr.
Eske salaıyq, buǵan deıin áleýmettik mańyzy bar azyq-túlik taýarlarynyń tizimi keńeıtilgenin jazdyq.
