Áleýmettik mańyzy bar azyq-túlik baǵasyn turaqtandyrý júıesine jańa shekteý engizildi
ASTANA. KAZINFORM - Jeke kompanııalar endi áleýmettik mańyzy bar azyq-túlik taýarlarynyń baǵasyn turaqtandyrý maqsatynda saqtandyrý sharttaryn óz qaryzdaryn qamtamasyz etý quraly retinde paıdalana almaıdy. QR Aýyl sharýashylyǵy mınıstrligi Joǵary aýdıtorlyq palatanyń nusqamasy negizinde tıisti ózgeristerdi bekitti.
Bul óńirlik áleýmettik-kásipkerlik korporatsııalarǵa (ÁKK) júrgizilgen memlekettik aýdıt barysynda anyqtaldy. Tekserý kezinde keıbir jaǵdaılarda bir jylǵa jasalǵan saqtandyrý sharttary ÁKK tarapynan uzaq merzimge berilgen qaryzdardy qamtamasyz etý quraly retinde qabyldanǵany belgili boldy. Osyndaı jaǵdaılardyń biri «Aqtóbe» ÁKK» AQ-da bolǵan.
Berilgen merzimde mindettemelerdi qamtamasyz etý kepiliniń bolmaýyna qaramastan jeke JShS-ǵa 544 mln teńgege qaryz berilgen. Nátıjesinde kompanııa qaryzdy qaıtara almaı, ÁKK óteý mindettemesin ózine alýǵa májbúr boldy. Mundaı jaǵdaılar qaıtalanbas úshin Joǵary aýdıtorlyq palata Aýyl sharýashylyǵy mınıstrligine Áleýmettik mańyzy bar azyq-túlik taýarlaryna baǵalardy turaqtandyrý tetikterin iske asyrýdyń úlgilik qaǵıdalaryna túzetýler engizýdi tapsyrdy.
Atap aıtqanda, qaryzdar boıynsha qamtamasyz etý retinde saqtandyrý sharttaryn paıdalaný múmkindigin tolyq alyp tastaý usynyldy.
-Bul ózgerister aýyl sharýashylyǵy mınıstriniń buıryǵy negizinde kúshine endi. Bul qadam óńirlik ÁKK-lerdiń qarjylyq turaqtylyǵyna jáne jalpy áleýmettik mańyzy bar azyq-túlik taýarlarynyń baǵasyn turaqtandyrý jónindegi jumystyń tıimdiligine oń áser etedi,-delingen habarlamada.
Memlekettik aýdıt qorytyndysy boıynsha Joǵary aýdıtorlyq palatanyń ózge de tapsyrmalary men usynymdarynyń oryndalýy baqylaýda bolady.
Aıta keteıik, osyǵan deıin Qazaqstan IAQU Bas assambleıasynda azyq-túlik qaýipsizdigi boıynsha jańa bastamalardy usynǵan bolatyn.
