Áleýmettik mańyzy bar 5 túrli azyq-túliktiń baǵasy tómendedi

ASTANA. KAZINFORM — Saýda jáne ıntegratsııa mınıstrligi 19 mamyrdaǵy málimet boıynsha áleýmettik mańyzy bar 5 túrli azyq-túliktiń baǵasy tómendegenin habarlady.

Maýsymaralyq kezeńde azyq-túlik baǵasyn turaqtandyrý tetigine saı, qyryqqabat — 5,3%-ǵa, jumyrtqa — 0,6%-ǵa, kúrish pen kartop — 0,2%-ǵa, súzbe — 0,1%-ǵa tómendedi. 6 taýar boıynsha baǵa ózgerissiz qaldy. Sábiz, pııaz, kúnbaǵys maıy, sút, sıyr jáne sary maı, tuz ben qantta azdaǵan qymbattaý tirkeldi. Jalpy aptalyq ósim — 0,2%. 

Bul ózgerister maýsymaralyq kezeńmen baılanysty: byltyrǵy ónim aıaqtalyp, erte ónimder naryqqa shyǵýda. Bul baǵanyń turaqtalýyna áser etedi dep kútiledi. 

— Baǵany baqylaý kúsheıtilip otyr. 2025 jyldyń basynan bastap óńirlerde 500-den astam komıssııa otyrysy ótip, 1 900-den asa quqyqbuzýshylyq anyqtaldy. Saýda ústemesin asyrǵandar endi aıyppulmen jazalanady. Elektrondy shot-faktýralar arqyly deldaldar áreketine taldaý júrgizilýde. 5 600-den astam tizbek zerttelip, 564-inde zańbuzýshylyq qaýpi anyqtaldy. Bul sharalar naryqtaǵy deldaldardy azaıtyp, baǵany turaqtandyrýǵa baǵyttalǵan, — delingen habarlamada.

Buǵan deıin habarlanǵandaı, azyq-túliktiń 11 túrine baǵanyń eń tómengi deńgeıi engizilmek.