Áleýmettik ilgerileý reıtınginde Qazaqstan 61-oryn aldy
ASTANA. KAZINFORM — Qazaqstan Áleýmettik ilgerileýdiń álemdik ındeksinde 171 eldiń ishinde 61-orynǵa turaqtady. Social Progress Index júrgizgen zertteýde elimiz atalǵan sala boıynsha 70,85 ball jınaǵan.
Reıtıng elderdiń ekonomıkalyq ósim kórsetkishterin emes, qoǵamdyq ál-aýqaty men áleýmettik damý deńgeıin baǵalaıdy. Indeksti daıyndaý barysynda 57 kórsetkish taldanyp, olar úsh negizgi sanatqa toptastyrylady: adamnyń negizgi qajettilikteri, ál-aýqattyń negizderi jáne damý múmkindikteri.
Sarapshylar halyqtyń azyq-túlikke, medıtsınalyq kómekke, turǵyn úıge, aýyz sýǵa, elektr energııasyna jáne sanıtarııalyq qyzmetterge qoljetimdiligin, jeke qaýipsizdik deńgeıin, bilim men aqparatqa qoljetimdilikti, densaýlyq saqtaý júıesiniń jaı-kúıin jáne ekologııalyq turaqtylyqty baǵalaıdy. Odan bólek, jeke jáne azamattyq bostandyq deńgeıi, adam quqyqtarynyń qorǵalýy, sondaı-aq, azamattardyń jeke sheshim qabyldaý jáne óz áleýetin iske asyrý múmkindikteri eskeriledi.
Reıtıngte Norvegııa 91,73 balmen kósh bastady. Sondaı-aq, alǵashqy bestikke Danııa, Fınlıandııa, Shvetsııa jáne Shveıtsarııa endi.
Áleýmettik salada kórsetkishi Qazaqstanmen shamalas elder arasynda Soltústik Makedonııa 71,24 balmen 60-oryndy, Taıland 70,79 balmen 62-oryndy, al Vetnam 70,76 balmen 63-oryndy ıelendi.
Aıta keteıik, áleýmettik ilgerileý ındeksin halyqaralyq uıymdardyń statıstıkalyq derekteri, saraptamalyq baǵalar jáne áleýmettik saýalnamalar nátıjeleri negizinde halyqaralyq Social Progress Imperative zertteý jobasy jyl saıyn jarııalap otyrady.
Eske salaıyq, buǵan deıin Qazaqstan 2026 jylǵy Jahandyq beıbitshilik ındeksinde (Global Peace Index 2026) ótken jylmen salystyrǵanda bes satyǵa joǵarylap, 44-orynǵa kóterilgen edi.
