Áleýmettik kvotamen grantqa kimder túse alady
ASTANA. KAZINFORM — Qazaqstanda áleýmettik osal sanattaǵy talapkerler memlekettik bilim granty konkýrsyna jalpy negizde emes, ózderine arnalǵan arnaıy kvota boıynsha qatysady. Bul týraly QR Ǵylym jáne joǵary bilim mınıstrligi Joǵary jáne joǵary oqý ornynan keıingi bilim berý komıteti basqarmasynyń basshysy Jandáýlet Qudaıbergenov Jibek Joly telearnasynyń «Búgin Live» baǵdarlamasynda aıtty.
Onyń aıtýynsha, jyl saıyn memlekettik bilim berý tapsyrysynyń belgili bir bóligi áleýmettik osal sanattaǵy talapkerlerge arnaıy kvota retinde bólinedi.
— Mysaly, tórt jáne odan da kóp bala tárbıelep otyrǵan kópbalaly otbasylardan shyqqan talapkerlerge memlekettik bilim berý tapsyrysynyń jalpy kóleminiń 5 paıyzy qarastyrylǵan. Sonymen qatar qandastarǵa, tolyq emes otbasynan shyqqan talapkerlerge jáne ózge de áleýmettik osal sanattarǵa arnaıy kvotalar bólinedi, — dedi Jandáýlet Qudaıbergenov.
Onyń sózinshe, tolyq emes otbasynan shyqqan talapkerler úshin memlekettik bilim berý tapsyrysynyń 3 paıyzy kózdelgen. Sondaı-aq I jáne II toptaǵy múgedektigi bar talapkerlerge, sondaı-aq I nemese II toptaǵy múgedektigi bar adamdy tárbıelep otyrǵan otbasylardan shyqqan talapkerlerge de arnaıy kvota beriledi.
— Bul talapkerler jalpy konkýrsqa qatyspaıdy. Olar tek ózderine arnalǵan kvota aıasynda baq synaıdy. Arnaıy kvota boıynsha bólingen granttarǵa jalpy konkýrsqa qatysýshylar úmitker bola almaıdy, — dedi komıtet basqarmasynyń basshysy.
Jandáýlet Qudaıbergenovtiń aıtýynsha, erekshe bilim berý qajettiligi bar talapkerlerge de qajetti qoldaý kórsetiledi.
— Eger talapkerdiń óziniń I nemese II toptaǵy múgedektigi bolsa nemese zańnamada kózdelgen ózge sanattardyń birine jatsa, arnaıy kvota boıynsha konkýrsqa qatysa alady. Sonymen qatar joǵary oqý oryndarynda oqý barysynda kórý, estý qabileti buzylǵan jáne ózge de erekshe bilim berý qajettiligi bar stýdentterge ınklıýzıvti bilim berý talaptaryna sáıkes qajetti jaǵdaı jasalyp, tıisti qoldaý kórsetiledi, — dedi ol.
Eske salaıyq, buǵan deıin sońǵy bes jylda erekshe bilim berý qajettiligi bar talapkerler sany shamamen toǵyz ese artqany habarlanǵan bolatyn.
