Áleýmettik kóńil kúı turaqty: kópshilik eldiń bolashaǵyna senedi

ASTANA. KAZINFORM — Qoǵamdyq saıasat ınstıtýty júrgizgen áleýmettik zertteý qorytyndysy jarııalandy. Zertteýge qatysqan respondentterdiń 79,4 paıyzy el durys baǵytta damyp keledi dep sanaıdy. 

— Maýsym aıyndaǵy zertteý el damýyna qatysty baǵalardyń turaqty ekenin kórsetip otyr. Bul tańdalǵan baǵytqa qatysty qoǵamda konsensýs saqtalyp, áleýmettik kóńil-kúıdiń ornyqty ekenin kórsetedi. Respondentterdiń basym bóligi (79,4%) el durys baǵytta damyp kele jatyr dep sanaıdy. Pikirlerdiń oń serpini áleýmettik-ekonomıkalyq jaǵdaıǵa qatysty da baıqalady. Maýsym aıynda respondentterdiń 73,6%-y bul jaǵdaıǵa oń baǵa bergen. Bul úrdis halyqtyń qazirgi ahýaldy qabyldaýynda turaqtaný úderisi júrip jatqanyn kórsetedi, — delingen atalǵan ınstıtýt taratqan aqparatta.

Zertteýge qatysýshylar saıası jaǵdaıdy da negizinen oń baǵalaıdy. Respondentterdiń 76,2 paıyzy qazirgi jaǵdaıǵa qanaǵattanatyndaryn bildirgen.

Qoǵam tarapynan berilgen joǵary oń baǵa kóbine saıası, áleýmettik-ekonomıkalyq jáne psıhologııalyq faktorlardyń jıyntyǵyna baılanysty. Olardyń qatarynda JІÓ-niń 6 paıyzǵa ósýi, jańa ınfraqurylymdyq jáne áleýmettik nysandardyń salynýy men iske qosylýy, TKSh jáne kólik ınfraqurylymyn jóndeý men jańǵyrtý jumystary bar.

Áleýmettik zertteý 025 jyly 18 maýsym men 4 shilde aralyǵynda júrgizildi. Oǵan 18 jastan asqan 2 000 azamat qatysty. Saýalnama ulttyq reprezentatıvti irikteme boıynsha júrgizildi. Іriktemeniń qatelik mólsheri ±2,2 paıyzdan aspaıdy. 

Aıta ketelik Qazaqstannyń strategııalyq zertteýler ınstıtýty júrgizgen saýalnama nátıjesine sáıkes, azamattardyń 73,3 paıyzy elimiz durys baǵytta damyp keledi dep esepteıdi.