Áleýmettik kómekke muqtaj otbasylardy anyqtaý tásili qaıta qaralady – mınıstr
ASTANA. KAZINFORM – Memleket basshysynyń tapsyrmasyn oryndaý maqsatynda Eńbek jáne halyqty áleýmettik qorǵaý mınıstrligi áleýmettik saıasatty qaıta qarap jatyr. Negizgi mindet – memlekettik kómekti shyn muqtaj azamattarǵa baǵyttaý.
Sala mınıstriniń aıtýynsha, qazir Premer-Mınıstrdiń orynbasarynyń tóraǵalyǵymen jumys toby qurylyp, belsendi jumys júrgizýde. Onyń quramyna Prezıdent Ákimshiliginiń, Strategııalyq josparlaý jáne reformalar agenttiginiń, Ulttyq ekonomıka jáne Qarjy mınıstrlikteriniń, sondaı-aq basqa da ortalyq memlekettik organdardyń ókilderi kirgen.
– Normatıvtik-quqyqtyq aktilerge saraptama júrgizilip, otbasynyń áleýmettik ál-aýqatyn baǵalaý ádistemesi pysyqtaldy. Qazirgi kezde otbasylardyń naqty materıaldyq jaǵdaıyn eskere otyryp, tıisti túzetýler engizilip jatyr, – dedi mınıstr Asqarbek Ertaev.
Sonymen birge Jasandy ıntellekt jáne tsıfrlyq damý mınıstrligimen birlesip, memlekettik organdardyń aqparattyq júıelerindegi derekterdi ózektendirý boıynsha revızııa júrgizilip jatyr.
Óńir ákimdikteri janynan jumys shtabtary qurylyp, járdemaqy alýshylardyń materıaldyq jaǵdaıyn tekserý qolǵa alynǵan.
– Qarasha aıynda muqtajdyq prıntsıpterin 2027 jylǵy 1 qańtardan bastap kezeń-kezeńmen engizý mehanızmderin jetildirý jumystary aıaqtalady. Bıylǵy jeltoqsanda Otbasynyń tsıfrlyq kartasy ekinshi deńgeıdegi bankterdiń júıesimen ıntegratsııalanady. Halyq arasynda reformanyń maqsattary jáne ony engizý tártibi týraly belsendi aqparattyq-túsindirý jumystary turaqty júrgizilip jatyr, – dedi Asqarbek Ertaev.
Jalpy otbasynyń áleýmettik ál-aýqatyn baǵalaý ádistemesi azamattardyń naqty jaǵdaıyna qaraı pysyqtalady. Atap aıtqanda, adamdardyń tabysyn jáne kredıttik mindettemelerin, onyń ishinde ıpotekalyq qaryzdardy baǵalaý tásilderi ózgertip jatyr.
Avtomobıl men aýyl sharýashylyǵy tehnıkasynyń bar-joǵy jáne jaǵdaıy eskeriledi. Otbasynyń asyraýǵa jumsalatyn shyǵyndardy, sondaı-aq otbasynyń jalǵyz asyraýshysy men jalǵyz turǵyn úıiniń bolýyn eskerý kózdelip otyr.
– Muqtajdyq prıntsıpterin engizýdiń pılottyq jobasy 2027 jyly 1 qańtarda iske qosylady. Birinshi-ekinshi kezeń qańtar-aqpan aılarynda, úshinshi-tórtinshi kezeń – aqpan, sáýir aılarynda júzege asyrylady. Memleket basshysy atap kósretkendeı, pılottyq jobany muqııat tekseristen ótkizýdiń birinshi kezeńinde áleýmettik kómekti ońtaılandyrýdyń tıimdiligi qaralatyn bolady. Nátıjesine qaraı bul jumysty keń aýqymda qoldanýǵa kirisemiz, – dedi Eńbek jáne halyqty áleýmettik qorǵaý mınıstri.
Keshe Memleket basshysy Qasym-Jomart Toqaev óz Joldaýynda negizsiz járdemaqylardyń kóbeıýi memlekettik basqarýdyń álsizdigin kórsetetinin aıtqan edi.
