Áleýmettik kómekke bólingen ár teńgege tańba salynady
ASTANA. KAZINFORM – Ulttyq bank tóraǵasynyń orynbasary Berik Sholpanqulov Senat uıymdastyrǵan dóńgelek ústelde teńgeni boıaý tehnologııasy áleýmettik tólemder júıesine engiziletinin málim etti.
- Qarjy mınıstrligimen, Kólik mınıstrligimen jol salý jobalary, sýbsıdııa boıynsha jumys istep jatyrmyz. Qazir Eńbek jáne halyqty áleýmettik qorǵaý mınıstrligi de kirisip jatyr. Áleýmettik kómek kepildi túrde alýshyǵa jetý kerek. Bólingen aqshany áleýmettik kómek alýshy alǵanyna kóz jetkizýge tańbalanǵan tsıfrlyq teńge múmkindik beredi, ózine tıesili aqshanyń izin tappaı qalmaıdy, - dedi Ulttyq bank ókili.
Sondaı-aq, ol «ákimshilendirilgen qosylǵan qun salyǵy» tetiginiń eksporttaýshylardyń jumysyn jeńildetetinin aıtty.
- Tsıfrlyq teńge qarjy tehnologııasynyń damýyna jaýap dep aıtýǵa bolady. Aǵymdaǵy trendterge jaýap retinde ázirlep iske qostyq. Qazir «ákimshilendirilgen qosylǵan qun salyǵy» tetigin iske qostyq. Qosylǵan qun salyǵyn tóleýshiler ol jobaǵa kirgisi keledi. Óıtkeni qosylǵan qun salyǵyn ótep berý merzimi 65 kúnnen 5 kúnge deıin qysqarady. Tipti 1 mınýtqa deıin qysqartý máselesi qaralyp jatyr.
Memlekettik kirister komıteti bul tetikti ázirge qolmen ıntegratsııalap jatyr. Jyl aıaǵyna deıin tolyq avtomattandyrýdy josparlap otyrmyz, - dedi ol senatorlardyń suraǵyna jaýap bere otyryp.
Buǵan deıin Ulttyq bank mamyr aıynda Ulttyq qordan 1 mlrd dollar satýy múmkin ekenin jazǵan edik.