Áleýmettik kómek alýshylar sany úsh esege azaıdy
ASTANA. KAZINFORM – Qazaqstanda ataýly áleýmettik kómek alýshylar sany keıingi jyldary aıtarlyqtaı qysqardy. Bul týraly QR Eńbek jáne halyqty áleýmettik qorǵaý vıtse-mınıstri Bahtııar Jazyqpaev málimdedi.
Onyń aıtýynsha, jańa tsıfrlyq tásilder men jasandy ıntellekt tehnologııalaryn engizý nátıjesinde kómekti taǵaıyndaý júıesiniń dáldigi artqan.
– Eger 2023 jyly ataýly áleýmettik kómekti 114 myń otbasy alsa, 2026 jyly bul kórsetkish 30 myńǵa deıin tómendedi. Sonymen qatar tólemder kólemi 57 mlrd teńgeden 5 mlrd teńgege deıin azaıdy, - dedi ol.
Vıtse-mınıstrdiń sózinshe, mundaı ózgeris muqtajdyqty baǵalaý júıesiniń jańarýymen baılanysty.
– Qazirgi tańda ótinish berýshilerdiń materıaldyq jaǵdaıy avtomatty túrde tekseriledi. Júıe memlekettik derekqorlar negizinde tabysyn, múlkin, jumyspen qamtylýyn jáne basqa da áleýmettik kórsetkishterin taldaıdy, - dedi Bahtııar Jazyqpaev.
Sonymen qatar turǵyn úı jaǵdaıyn baǵalaý úshin fotosýretterdi taldaıtyn tehnologııa da qoldanylyp jatyr. Bul azamattardyń ómir súrý deńgeıin naqtyraq anyqtaýǵa múmkindik beredi.
Jınalǵan derekter negizinde júıe sheshim qabyldaýǵa usynymdar qalyptastyrady. Al túpkilikti sheshim mamannyń quzyretinde qalady. Osy tásil arqyly búgingi kúni shamamen 48 myń ótinish qaralǵan.
– Jańa tehnologııalar negizsiz tólemderdi boldyrmaýǵa jáne áleýmettik kómektiń ataýlylyǵyn arttyrýǵa múmkindik berip otyr, - dep túıindedi Bahtııar Jazyqpaev.
Aıta keteıik, buǵan deıin Eńbek mınıstrligi arnaýly áleýmettik qyzmetterdiń ashyqtyǵyn arttyrý úshin derekqorlardy biriktirý boıynsha pılottyq joba bastaǵan edi.
