Áleýmettik qoldaý tártibi ózgeredi: eGov Mobile-da ár otbasynyń tsıfrlyq profıli jasalady
ASTANA. KAZINFORM — Qazaqstan áleýmettik qoldaý júıesin túbegeıli jańartyp, memlekettik kómekti azamattardyń sanatyna emes, otbasynyń naqty muqtajdyǵy men ál-aýqatyna qaraı taǵaıyndaıdy. Bul týraly Úkimet otyrysynda Eńbek jáne halyqty áleýmettik qorǵaý mınıstri Asqarbek Ertaev málimdedi.
Mınıstrdiń aıtýynsha, áleýmettik qoldaý júıesin odan ári jetildirý sheńberinde ataýly jáne muqtajdyq qaǵıdattaryn iske asyrý negizgi jańashyldyq bolady.
— Negizgi basymdyq sanattyq tásilden otbasynyń naqty muqtajdyǵy men ál-aýqat deńgeıin keshendi jáne ataýly baǵalaýǵa aýysady. Bul memlekettik resýrstardy anaǵurlym ádil jáne tıimdi bólýge, memlekettik qoldaýdy oǵan shyn máninde muqtaj azamattarǵa ǵana baǵyttaýǵa múmkindik beredi. Sonymen qatar áleýmettik saıasat bilim berý jáne eńbek arqyly azamattardyń ál-aýqatynyń turaqty ósýine jaǵdaı jasaýǵa baǵyttalady, — dep atap ótti A. Ertaev.
Atalǵan tásilderdi iske asyrý qarajatty adamı kapıtaldy damytýǵa qaıta bólýge jáne memlekettik qoldaýdy oǵan barynsha muqtaj azamattarǵa baǵyttaýdy kúsheıtýge múmkindik beredi.
— Búginde Otbasynyń tsıfrlyq kartasy boıynsha úı sharýashylyqtarynyń ál-aýqatyn baǵalaý ádistemesi ózektendirildi, vedomstvoaralyq ózara is-qımyldyń biryńǵaı algorıtmi ázirlendi jáne negizgi memlekettik aqparattyq júıelermen ıntegratsııalar iske asyryldy. Platformanyń fýnktsıonaly jáne otbasy quramyn qalyptastyrý mehanızmi pysyqtaldy, — deıdi mınıstr.
Kelesi kezeń — «eGov Mobile» qosymshasynda úı sharýashylyqtarynyń tsıfrlyq profılderin qalyptastyrý jáne banktermen, Qarjy mınıstrligimen jáne kredıttik bıýrolarmen ıntegratsııalaý arqyly derekter quramyn keńeıtý.
Bul otbasylardyń naqty tabystaryn, shyǵystaryn jáne qarjylyq jaǵdaıyn eskerýge múmkindik beredi. Nátıjesinde týyndaǵan problemalarǵa den qoıýdan olardy erte kezeńde aıqyndaýǵa kóshedi. Bul árbir otbasyǵa ataýly jáne proaktıvti qoldaý kórsetýdi qamtamasyz etedi.
— Biryńǵaı tsıfrlyq platformany engizý sheńberinde jergilikti atqarýshy organdar
13 qoldaý sharasyn avtomattandyrdy, «Áleýmettik ámııan» júıesimen ıntegratsııalaý jasaldy, áleýmettik tólemderdi taǵaıyndaýdyń ashyqtyǵy men aıqyndyǵy artty. Jyl sońyna deıin qoldaý sharalaryn ataýlylyq qaǵıdaty boıynsha taǵaıyndaý, eGov (mobile) arqyly ótinish berý múmkindigin usyný, jekelegen qyzmetter boıynsha qaǵaz anyqtamalardy alyp tastaý jáne memlekettik qoldaýdyń barlyq sharalaryn «Áleýmettik ámııanda» kórsetý josparlanýda, — dedi Asqarbek Ertaev.
Aıta keteıik, búgin jańa Konstıtýtsııa kúshine endi. Jalpyhalyqtyq referendým nátıjesinde qabyldanǵan tarıhı qujat memlekettik basqarý júıesin, qoǵamnyń damý baǵytyn túbegeıli ózgertpek.
Prezıdent qazaqstandyqtardy Jańa Konstıtýtsııanyń kúshine enýimen quttyqtady.
Sondaı-aq Premer-mınıstr Oljas Bektenov barlyq memlekettik jáne qoǵamdyq ınstıtýtty túbegeıli jańǵyrtý bastalǵanyn aıtqan edi.
