Áleýmettik qoldaý ótinish qaǵıdatynan muqtajdardy anyqtaýǵa kóshedi

ASTANA. KAZINFORM – Jyl basynan beri Qazaqstanda halyqty áleýmettik qoldaýǵa 3,4 trln teńge baǵyttaldy, tólemder 4,5 mln adamdy qamtydy. Bul týraly Úkimettiń baspasóz qyzmeti habarlady. 

Memleket basshysynyń Joldaýda berilgen tapsyrmalaryn oryndaý úshin Úkimet kómektiń ataýly formatyna kóshýdi júzege asyrady. Munyń negizgi quraldary azamattardy kedeılikten shyǵarýǵa baǵyttalǵan «Áleýmettik kelisimshart» jáne «Otbasynyń tsıfrlyq kartasy» boldy.

Jańa tásil qazirdiń ózinde óziniń tıimdiligin kórsetýde. Ataýly áleýmettik kómekti «Áleýmettik kelisimshart» negizinde 48 myń otbasy alady, onyń ishinde 8,3 myń eńbekke qabiletti azamat jumysqa ornalastyrylyp, oqytý nemese óz isin ashý arqyly turaqty tabys kózine ıe boldy.

Munyń tehnologııalyq negizi «Otbasynyń tsıfrlyq kartasy» bolyp sanalady, ol ártúrli memlekettik júıelerdegi derekterdi taldaıdy, qoldaýdy qajet etetinderdi derbes anyqtaıdy jáne bıýrokratııany joıady. Júıege 128 Otbasyn qoldaý ortalyqtarynyń qyzmeti kiriktirilgen, bul ómirlik qıyn jaǵdaıǵa tap bolǵan 4 myń otbasyǵa keshendi kómek kórsetýge múmkindik berdi.

Aıta ketelik 260 myńǵa jýyq adam ataýly áleýmettik kómek aldy.