Áleýmettik qoldaý: otbasynyń ál-aýqaty qalaı eskeriledi
ASTANA. KAZINFORM – Qazaqstanda eki júzden astam azamat keıbir memlekettik járdemaqylardy alýdy óz erkimen toqtatý týraly sheshim qabyldady. Bul baǵyttaǵy jumys jalǵasyp jatyr, al mundaı sheshim qabyldaǵandardyń sany birtindep artyp keledi.
Qazirgi turmystyq jaǵdaıyn baǵalaı kele, otbasyn óz betinshe qamtamasyz ete alatynyna kóz jetkizgen azamattar osyndaı sheshim qabyldaǵan. Olar memlekettik kómekten múlde bas tartyp jatqan joq. Tek ózderine tıesili tólemdi alýdy toqtatyp, bul kómektiń búgingi kúni shyn muqtaj otbasylarǵa baǵyttalǵanyn qalaıdy.
Mundaı sheshim qabyldaǵan azamattar týraly aqparattar elimizdiń ár óńirinen túsip jatyr. Olardyń arasynda kásipkerler, kópbalaly ata-analar jáne turmystyq jaǵdaıyn jaqsartyp, búginde otbasyn óz betinshe qamtamasyz ete alatyndar da bar.
Buryn atalǵan járdemaqylar azamattyń belgili bir áleýmettik sanatqa jatýyna qaraı taǵaıyndalatyn. Keıbir járdemaqylar azamat ótinish bermeı-aq, avtomatty túrde rásimdeletin. Al SMS arqyly járdemaqydan óz erkimen bas tartýdyń jeńildetilgen tártibi buryn bolmaǵan. Endi azamattarǵa osyndaı múmkindik berilip otyr.
Buǵan deıin Otbasynyń tsıfrlyq kartasyndaǵy málimetter boıynsha áleýmettik jaǵdaıy joǵary A sanatyna jatatyn otbasylardyń keıbir járdemaqy alýshylaryna SMS-habarlama jiberilgen. Onda azamattarǵa tıisti tólemnen óz erkimen bas tartý múmkindigi túsindirilgen.
Azamat járdemaqydan bas tartý týraly sheshimin SMS-habarlamaǵa jaýap berý arqyly bildire alady. Óz erkimen bas tartqan azamattardyń tıisti tólemderi 2027 jylǵy 1 qańtarǵa deıin, ıaǵnı áleýmettik qoldaýdyń jekelegen túrlerin taǵaıyndaýdyń jańa tártibi kúshine engenge deıin toqtatylady. Bul rette tek azamat bas tartqan tólem ǵana toqtatylady.
Otbasynyń tsıfrlyq kartasy memleketke ár otbasynyń áleýmettik-ekonomıkalyq jaǵdaıyn naqtyraq baǵalaýǵa kómektesedi. Sonyń negizinde memlekettik qoldaý otbasynyń shynaıy jaǵdaıyna qaraı kórsetiledi. Áleýmettik qorǵaý júıesin jetildirýdegi basty maqsat ta osy, kómekti ýaqytynda kórsetip, ony eń aldymen shyn muqtaj adamdarǵa baǵyttaý.
Osy rette SMS-habarlamanyń kelýi járdemaqynyń avtomatty túrde toqtatylatynyn nemese tólenbeı qalatynyn bildirmeıdi. Bul sheshimdi azamattyń ózi qabyldaıdy. Al zańda kózdelgen járdemaqyny alýdy jalǵastyrǵan azamattar memlekettik qoldaýǵa degen zańdy quqyǵyn paıdalana beredi.
Keıbir otbasylar úshin memlekettik kómek ómiriniń belgili bir kezeńinde úlken qoldaý bolǵan. Al búginde turmysy túzelip, tabysy artqan soń, olar járdemaqydan óz erkimen bas tartýdy jón kórip otyr. Muny áleýmettik kómektiń naqty muqtaj adamdarǵa baǵyttalýyn qoldaý dep túsinýge bolady.
Máselen, Aqtóbe qalasynyń turǵyny, alty balanyń anasy ári kásipker Qalaýsha Sadyqova ózkásibin endi bastaǵan kezde memlekettik qoldaýdyń otbasy úshin mańyzdy bolǵanyn aıtady.
— Men kópbalaly ana retinde memlekettik kómektiń otbasy úshin qanshalyqty mańyzdy ekenin jaqsy túsinemin. Óz kásibimdi endi bastaǵan kezde bul qoldaýdyń biz úshin paıdasy zor boldy. Qazir kásibim damyp, otbasymdy ózim qamtamasyz ete alamyn.
Sondyqtan kópbalaly otbasylarǵa beriletin járdemaqydan óz erkimmen bas tartý týraly sheshim qabyldadym. Memlekettik kómekti naqty muqtaj otbasylarǵa baǵyttaý olardyń jaǵdaıyna kóbirek kóńil bólýge múmkindik beredi dep oılaımyn, — deıdi Qalaýsha Sadyqova.
Osyndaı sheshimdi «Jaıyq» voleıbol klýbynyń dırektory Azamat Nurmuhambetov te qabyldaǵan. Ol I toptaǵy múgedektigi bar adamǵa kútim jasaıtyn tulǵa retinde aı saıynǵy memlekettik járdemaqy alyp kelgen.
— Áleýmettik kómek kórsetýde ataýlylyq qaǵıdatyn qoldaımyn. Ár adamnyń ómirlik jaǵdaıy ártúrli, al memlekettik qoldaý kóptegen azamat úshin óte mańyzdy. Ózim alyp júrgen járdemaqydan óz erkimmen bas tartýdy jón kórdim. Osyndaı tásil qıyn jaǵdaıǵa tap bolǵan adamdarǵa kómekti tıimdirek kórsetýge múmkindik beredi dep sanaımyn, — deıdi Azamat Nurmuhambetov.
Qostanaı oblysynda turatyn kópbalaly ana Anna Sherer de óz oqıǵasymen bólisti. Ol jubaıymen birge agrobıznespen aınalysyp, aýyl sharýashylyǵyn damytýǵa úles qosyp júr.
— Joldasym ekeýmiz jumys isteımiz, tórt balany tárbıelep otyrmyz. Otbasymyzdy óz kúshimizben qamtamasyz etýge tyrysamyz. Qazir materıaldyq jaǵdaıymyz kópbalaly otbasylarǵa beriletin járdemaqydan óz erkimizben bas tartýǵa múmkindik beredi. Bul — ózimiz qabyldaǵan sanaly sheshim. Degenmen mundaı kómektiń kóptegen ata-ana úshin, ásirese ómirdiń qıyn kezeńderinde, qanshalyqty mańyzdy ekenin jaqsy túsinemin. Memlekettik kómek júıesine qurmetpen qaraımyn. Eń bastysy, kómek kórsetkende ár otbasynyń naqty jaǵdaıy eskerilýi kerek dep oılaımyn, — deıdi Anna Sherer.
Eńbek jáne halyqty áleýmettik qorǵaý mınıstrliginiń málimetinshe, mundaı sheshimder eń aldymen azamattardyń ómirlik jaǵdaıynyń ózgergenin kórsetedi. Eger otbasy búginde ózin-ózi qamtamasyz ete alsa, tıisti járdemaqydan óz erkimen bas tartý múmkindigin paıdalana alady. Al otbasynyń materıaldyq jaǵdaıy ózgerse, onyń áleýmettik ál-aýqaty da qaıta baǵalanýy múmkin.
Osylaısha, jańa tásildiń negizinde adamnyń ózi jáne onyń naqty ómirlik jaǵdaıy tur. Memleket áleýmettik qoldaý júıesin jetildirý arqyly kómekti shynymen qajet jerge baǵyttaýdy kózdeıdi. Bul rette zańda qarastyrylǵan áleýmettik kepildikter saqtalady.
2027 jyldyń 1 qańtarynan bastap Qazaqstanda memlekettik áleýmettik qoldaýdyń keıbir túrlerin taǵaıyndaý kezinde jańa tásilder qoldanyla bastaıdy. Tıisti kómekke quqyǵy bar-joǵyn anyqtaǵanda azamattyń belgili bir áleýmettik sanatqa jatatyny ǵana emes, Otbasynyń tsıfrlyq kartasyndaǵy málimetter negizinde baǵalanatyn otbasynyń áleýmettik ál-aýqaty da eskeriledi.
Ózgeristerdiń basty maqsaty memlekettik kómekti barynsha naqty ári ádil kórsetý. ıAǵnı, búgin kómekke muqtaj adamdarǵa der kezinde qoldaý bildirip, turmysy jaqsarǵan otbasylardyń jaǵdaıyndaǵy oń ózgeristerdi de eskerý.
