Áleýmettik kodeksti jetildirý jumysy jalǵasady — Aıda Balaeva
ASTANA. KAZINFORM — Eńbek kodeksiniń jekelegen normalaryna áleýmettik áriptestikti damytýǵa jáne qaýipsiz eńbek jaǵdaılaryn qamtamasyz etýge baǵyttalǵan ózgerister engiziledi. Bul týraly Úkimet otyrysynda Premer-mınıstrdiń orynbasary — Mádenıet jáne aqparat mınıstri Aıda Balaeva aıtty.
— Jańa Konstıtýtsııa Qazaqstannyń demokratııalyq, zaıyrly, quqyqtyq jáne áleýmettik memleket retindegi negizgi qaǵıdattarynyń ózgermeıtindigin taǵy bir márte aıqyndady. Sonymen birge áleýmettik saıasat jańa strategııalyq mazmunmen tolyqty. Buǵan deıin negizgi nazar kóbine áleýmettik kepildikter júıesine aýdarylyp kelse, jańa Konstıtýtsııa áldeqaıda keń tásildi bekitedi. Atap aıtqanda, azamattardyń ál-aýqatynyń ósýiniń negizgi faktorlary retinde adamı kapıtaldy damytýǵa, bilim berýge, ǵylym men ınnovatsııalarǵa basymdyq beriledi. Osyǵan baılanysty Áleýmettik kodeksti jetildirý jumysy jalǵasady, — dedi vıtse-premer.
Onyń aıtýynsha, jumyspen qamtýdy damytýǵa, sapaly jumys oryndaryn ashýǵa, azamattardyń kásibı bilim alý men biliktiligin arttyrý múmkindikterin arttyrýǵa nazar aýdarylady. Múgedektigi bar adamdardy áleýmettik qorǵaý júıesin jetildirý, olardy ońaltý tetikterin damytý jáne qoǵamdyq ári eńbek ómirine tolyqqandy ıntegratsııalaý baǵytyndaǵy jumystar jalǵasady.
— Sonymen qatar eńbek zańnamasyn jetildirý josparlanýda. Jańa Konstıtýtsııa ár azamattyń eńbek etý quqyǵyn bekitip, ony júzege asyrý úshin memleket tıisti jaǵdaı jasaýǵa mindetti ekenin aıqyndaıdy. Osyǵan baılanysty Eńbek kodeksiniń jekelegen normalaryna sapaly jumys oryndaryn arttyrýǵa, áleýmettik áriptestikti damytýǵa jáne qaýipsiz eńbek jaǵdaılaryn qamtamasyz etýge baǵyttalǵan ózgerister engizý kózdelip otyr. Tsıfrlyq ekonomıkanyń qarqyndy damýyn eskere otyryp, eńbek zańnamasy jumyspen qamtýdyń jańa nysandaryna, sonyń ishinde qashyqtan jáne platformalyq jumyspen qamtý formalaryna beıimdeletin bolady. Jalpy alǵanda, áleýmettik salada jańa Konstıtýtsııany iske asyrý adamnyń ózi, onyń bilimi, kásibı biliktiligi men damý múmkindikteri basty qundylyq sanalatyn zamanaýı áleýmettik memleket modelin qalyptastyrýǵa baǵyttalǵan, — dedi ol.
Aıta keteıik, Úkimet jańa Konstıtýtsııa normalaryn júzege asyrý joldaryn talqylap jatyr.
