Áleýmettik qyzmetter portalyna taýarlardy sáıkestendirý kodtarymen engizý tártibi ózgeredi
ASTANA. KAZINFORM – Eńbek jáne halyqty áleýmettik qorǵaý mınıstrligi «Taýarlardy jáne (nemese) kórsetiletin qyzmetterdi, múgedektigi bar adamdardy ınvataksımen tasymaldaý jónindegi kórsetiletin qyzmetterdi berýshilerdi áleýmettik kórsetiletin qyzmetter portalynda tirkeý nemese olardy tirkeýden shyǵarý, sondaı-aq taýarlardy jáne (nemese) kórsetiletin qyzmetterdi áleýmettik kórsetiletin qyzmetter portalyna jiberý qaǵıdalaryna» ózgerister engizýdi josparlap otyr.
Jańa talaptarǵa sáıkes, áleýmettik qyzmetter portalynda usynylatyn taýarlar Ulttyq taýarlar katalogynan alynǵan sáıkestendirý kodtarymen belgilenýi mindetti bolady. Bul týraly mınıstrlik basshysynyń buıryq jobasy «Ashyq NQA» portalynda jarııalandy.
Osy ózgerister nátıjesinde portalǵa ornalastyrylatyn barlyq taýar Ulttyq taýarlar katalogynda tirkelýi qajet. Atalmysh sharalar taýar túrlerin standarttaýǵa, ónimderdiń jetkizýshiden naqty tapsyrys berýshige deıingi qozǵalysyn baqylaýǵa jáne jalǵan mámilelerdiń aldyn alýǵa múmkindik beredi.
Jańa talaptar taýarlardyń biryńǵaı jáne senimdi esebin júrgizýdi qamtamasyz etýge, olardyń sapasy men shyǵý tegine baqylaýdy kúsheıtýge, barlyq jetkizýshi úshin teń jaǵdaı jasaýǵa, sondaı-aq sertıfıkattalmaǵan jáne sapasy tómen ónimderdiń naryqqa túsýin boldyrmaýǵa baǵyttalǵan.
Sonymen qatar ózgerister aıasynda portal jetkizýshilerinen taýarlardyń grafıkalyq beınelerimen birge aqparattyq mátindik sıpattama usyný talap etiledi. Bul sıpattama taýardyń maqsaty, fýnktsıonaldyǵy jáne tehnıkalyq parametrlerin qamtýy tıis. Sıpattamanyń bolýy taýardy portalǵa jiberý jónindegi komıssııanyń baǵalaý krıterııleriniń biri retinde qarastyrylady.
Atalǵan jańashyldyq taýarlar týraly aqparattyń tolyqtyǵy men senimdiligin arttyrýǵa, sondaı-aq kórý qabileti buzylǵan adamdardyń portaldy paıdalaný kezinde týyndaıtyn qoljetimdilik máselelerin joıýǵa arnalǵan.
Ózgerister 2026 jylǵy 1 qańtardan bastap qoldanysqa engizilmek. Bul is-shara áleýmettik qyzmetter portaly men Ulttyq taýarlar katalogyn ıntegratsııalaý maqsatynda júzege asyrylyp jatyr. Buıryq jobasy týraly aqparat 2026 jylǵy 2 aqpanǵa deıin «Ashyq NQA» ınternet-portalynda qoǵamdyq talqylaýǵa usynylǵan.
Buǵan deıin sheteldik marketpleısterden satyp alynǵan taýarlardy jetkizýdiń jańa tártibi engizilgenin habarlaǵan edik.
