Áleýmettik qyzmetter portaly men Ulttyq taýarlar katalogy biriktiriledi – mınıstrlik

ASTANA. KAZINFORM – QR Eńbek jáne halyqty áleýmettik qorǵaý mınıstrligi múgedektigi bar adamdardy tehnıkalyq ońaltý quraldarymen qamtamasyz etý júıesin jetildirý boıynsha buıryq jobasyn ázirledi. «Ashyq NQA» portalynda ornalastyrylǵan qujat rásimderdiń ashyqtyǵyn jáne usynylatyn taýarlardyń sapasyn arttyrýǵa baǵyttalǵan.

Basty jańashyldyqtardyń biri – Áleýmettik qyzmetter portalyn Ulttyq taýarlar katalogymen biriktirý. Endi barlyq ónimge biregeı sáıkestendirý kody berilip, mindetti tirkeýden ótetin bolady. Bul árbir buıymnyń ónim berýshiden naqty alýshyǵa deıingi jolyn qadaǵalaýǵa múmkindik beredi. Biryńǵaı esepke alýdy engizý jalǵan mámilelerdiń jasalý múmkindigin azaıtyp, naryqty sertıfıkattalmaǵan jáne sapasyz taýarlardyń túsýinen qorǵaıdy.

Buıryq jobasynda kórý qabileti tómen azamattar úshin platformanyń qoljetimdiligin arttyrýǵa erekshe nazar aýdarylǵan. Osyǵan oraı mindetti talap engiziledi: taýardy Portalǵa jiberý kezinde arnaıy komıssııa fotosýretterge egjeı-tegjeıli mátindik sıpattamanyń bolýyn tekseretin bolady. Paıdalanýshylar kedergisiz durys tańdaý jasaı alýy úshin onda buıymnyń maqsaty, fýnktsıonaly jáne tehnıkalyq sıpattamalary naqty jazylýy tıis.

Sonymen qatar bıýdjet qarajatyn neǵurlym utymdy paıdalaný úshin múgedektigi bar adamdardy gıgıenalyq quraldarmen (jórgektermen) toqsan saıyn qamtamasyz etý týraly norma bekitiledi. Vedomstvo usynylatyn quraldardyń jalpy kepildendirilgen jyldyq kólemi ózgerissiz qalatynyn basa aıtady.

Buıryq jobasy Eńbek mınıstrliginiń qoldanystaǵy normalaryn Múgedektigi bar adamdardy avtomobıl kóligimen tasymaldaý (ınvataksı) qyzmetterin kórsetý qaǵıdalaryna qatań sáıkestendiredi.

Buıryq jobasy «Ashyq NQA» portalynda 2026 jylǵy 20 naýryzǵa deıin jarııa talqylaý úshin qoljetimdi.

Eske sala keteıik, buǵan deıin eńbek shartyn tirkeýge qatysty jańa talaptar men jaýapkershilik engiziletinin habarlaǵanbyz.