Áleýmettik qyzmetter portaly arqyly 48 myńnan astam qyzmet kórsetildi
ASTANA. KAZINFORM – 2026 jyldyń basynan beri Áleýmettik qyzmetter portaly arqyly múgedektigi bar adamdardyń 48,7 myń tapsyrysy oryndaldy, dep jazdy Eńbek jáne halyqty áleýmettik qorǵaý mınıstrligi.
Jyl basynan beri portal arqyly shamamen 35,4 myń múgedektigi bar adam ońaltýdyń tehnıkalyq quraldaryn aldy. Sonymen qatar 3,6 myń adamǵa ymdaý tili qyzmeti kórsetildi, 9,1 myń adam jeke kómekshiniń qyzmetin paıdalandy, al 576 adam shıpajaılyq-kýrorttyq emdeýmen qamtyldy.
- Portal múgedektigi bar adamdarǵa ońaltýdyń tehnıkalyq quraldary men qyzmetterin óndirýshini jáne jetkizýshini óz betinshe tańdaýǵa múmkindik beredi. Kómek túrine tapsyrys berý kórsetiletin qyzmetti alýshynyń elektrondyq tsıfrlyq qoltańbasymen rastalady. Tapsyrys berilgen ońaltýdyń tehnıkalyq quraldaryn jetkizý arqyly nemese óz betinshe alyp ketý jolymen alýǵa bolady.
Múgedektigi bar adamdardy ońaltý quraldarymen qamtamasyz etý protezdik-ortopedııalyq, sýrdotehnıkalyq, tıflotehnıkalyq jáne gıgıenalyq quraldardy, sondaı-aq kreslo-arbalardy qamtıdy, - delingen vedomstvo aqparatynda.
Qazirgi ýaqytta Portalda 612 arnaýly áleýmettik qyzmet kórsetýshi, 1041 ońaltýdyń tehnıkalyq quraldaryn jetkizýshi, 32 myńnan astam jeke kómekshi, 776 ymdaý tili qyzmetin usynýshy jáne 130 shıpajaılyq-kýrorttyq emdeý uıymy tirkelgen.
Portaldy paıdalaný boıynsha konsýltatsııalardy 1414 biryńǵaı baılanys ortalyǵy arqyly alýǵa bolady.
Aıta keteıik, Almatyda múgedektigi bar adamdar úshin 34 myń nysanǵa aýdıt júrgizildi.