Áleýmettik qyzmetter kórsetetin uıymdarǵa jańa laýazymdar engiziledi

ASTANA. KAZINFORM — Ashyq NQA portalynda «Eńbek jáne halyqty áleýmettik qorǵaý mınıstrliginiń keıbir buıryqtaryna ózgerister men tolyqtyrýlar engizý týraly» buıryǵy jobasy jarııalandy.

Qujatqa sáıkes, eń tómengi shtattyq normatıvterdi qaıta qaraý bóliginde arnaýly áleýmettik qyzmetter kórsetetin uıymdar qyzmetiniń qaǵıdalaryna mynadaı ózgertýler men tolyqtyrýlar engiziledi:

— dırektordyń medıtsınalyq jumys jónindegi orynbasary,
— aǵa meıirger laýazymdary;
— qajet bolǵan jaǵdaıda dezınfektory, sý sorǵy stansasynyń mashınısi (motorısti), elektr gazben dánekerleýshi laýazymdary;
— júrgizýshimen avtokólikti jalǵa alý týraly shart bolǵan kezde júrgizýshi laýazymy talap etilmeıdi;
— kúzetshi laýazymy qyzmet kórsetý jáne/nemese «Kúzet» qaýipsizdik júıesine qosylý jónindegi kúzet uıymymen shart bolǵan kezde talap etilmeıdi.

Arnaýly áleýmettik qyzmetterge tarıfterdi qalyptastyrý qaǵıdalary men ádistemesinde arnaýly áleýmettik qyzmetterge tarıfterdi aıqyndaý men qalyptastyrý qaıta qaralady. Qosymsha aqylardy, onyń ishinde demalys, mereke kúnderindegi jumys úshin jáne basqa da tólemder kózdeledi.

Buıryq jobasy 18 maýsymǵa deıin qoǵamdyq talqylaýǵa shyǵarylyp otyr.

Buǵan deıin áleýmettik qyzmetter portaly múgedektigi bar jandarǵa qandaı qyzmetter kórsetetinin jazǵan edik.