Svetlana Jaqypova áleýmettik qyzmetterdi lıtsenzııalaý kezinde anyqtalǵan kemshilikterdi atady

ASTANA. KAZINFORM – Eńbek jáne halyqty áleýmettik qorǵaý mınıstri Svetlana Jaqypova tsıfrlandyrýdyń arqasynda qaǵaz júzinde negizsiz jazylǵan málimetter anyqtalyp jatqanyn aıtty.

- Biz áleýmettik qyzmetterdi lıtsenzııalaýdy júzege asyrdyq. Bul protsedýra birqatar keleńsiz aspektilerdi anyqtady. 2009 jyldan bastap keıbir uıymdar qyzmet kórsetken, biraq talaptarǵa saı bolmady. Atap aıtqanda, búginde 500-ge jýyq lıtsenzııasy bar uıym osy sapany qamtamasyz etýi tıis, - dedi S. Jaqypova Senat janyndaǵy máslıhattarmen ózara is-qımyl jónindegi keńestiń keńeıtilgen otyrysynda.

Onyń aıtýynsha, Premer-mınıstrdiń tapsyrmasy aıasynda lıtsenzııalaý máselesi boıynsha mınıstrlik barlyq saladaǵy áleýmettik ınfraqurylym sýbektileriniń qyzmetin tolyǵymen tsıfrlandyryp jatyr. Bul joba Shymkentte júzege asyrylyp otyr.

- Osy tsıfrlandyrý balalar úılerine, jetimder úılerine, kámeletke tolmaǵandardy beıimdeý ortalyǵyna, túzetý ortalyqtaryna qatysty. Mundaǵy basty maqsat – jergilikti atqarýshy organdardyń bıýdjetterinde tıimdi bólýdi qamtamasyz etý. Áleýmettik qyzmetterge qatysty naqty kórsetkishterdi aıtsaq, memlekettik bıýdjetke 31 mlrd teńgege jýyq qarjyny qaıtardyq. Bul qalaı boldy? Sebebi tek qaǵaz júzinde negizsiz esepter bolǵan. Tsıfrlandyrý boıynsha jumystardy atqarý kezinde áleýmettik qyzmet kórsetti degen 1039 uıym týraly málimet usynylǵan, al is júzinde olardyń 800-ge jýyǵy qalǵan. Sonyń ishinde 500-ine lıtsenzııa berdik, qalǵan 300-ine talapqa saı emes dep bas tarttyq. Qaǵaz júzinde qyzmet kórsetilip júr degen málimettermen 135 myńǵa jýyq adamǵa qatysty esep usynylǵan, alaıda 82 myń adamǵa qyzmet kórsetilgeni naqtylandy, - dedi vedomstvo basshysy.

Budan buryn habarlanǵandaı, búgin elordada Senat janyndaǵy máslıhattarmen ózara is-qımyl jónindegi keńestiń keńeıtilgen otyrysy ótti.