Áleýmettik qyzmetkerler aýtızmi bar balalardyń otbasylarymen qalaı jumys isteıdi
ASTANA. KAZINFORM – Qazaqstanda aýtızm spektriniń buzylysy (ASB) bar balalardy tárbıelep otyrǵan otbasylarǵa áleýmettik qoldaý kórsetý boıynsha mamandarǵa arnalǵan praktıkalyq ádistemelik nusqaýlyq ázirlenip jatyr, dep habarlaıdy Eńbek jáne halyqty áleýmettik qorǵaý mınıstrligi.
Nusqaýlyqty mınıstrliktiń Ulttyq áleýmettik qorǵaý salasyn damytýdyń ǵylymı ortalyǵy ázirleýde. Ol otbasylarmen kúndelikti jumys isteıtin áleýmettik qyzmetkerlerge arnalǵan praktıkalyq qural bolmaq.
Mınıstrlik málimetinshe, aýtızm spektriniń buzylysy adamnyń qarym-qatynas jasaýyna, áleýmettik ortadaǵy áreketine, minez-qulqyna jáne qorshaǵan ortany qabyldaýyna áser etýi múmkin. ASB bar ár balanyń ereksheligi, qabileti jáne qoldaýǵa degen qajettiligi ártúrli bolǵandyqtan, áleýmettik jumysta bala men onyń otbasyna jeke kózqaras qajet.
Jańa nusqaýlyqta ár otbasynyń jaǵdaıy men suranysyn eskere otyryp, jumysty júıeli uıymdastyrýǵa arnalǵan algorıtmder men usynymdar qamtylady.
– Negizgi qaǵıdalardyń biri – otbasymen seriktestik ornatý. Balanyń ereksheligin, onyń qarym-qatynas jasaý tásilderin, kúndelikti qajettilikterin jáne qandaı qıyndyqtarǵa tap bolatynyn ata-anasy men jaqyndary jaqsy biledi. Sol sebepti maman otbasynyń tájirıbesi, múmkindikteri men qolda bar resýrstaryna súıene otyryp, aldaǵy qadamdardy otbasy múshelerimen birge aıqyndaýy qajet, – delingen mınıstrlik aqparatynda.
Qujatta otbasymen alǵashqy áńgimelesýdi ótkizý algorıtmi, onyń negizgi qajettilikteri men suranystaryn anyqtaý jónindegi usynymdar beriledi. Sondaı-aq otbasynyń kúshti jaqtary men qolda bar resýrstaryn baǵalaý tásilderi jáne aldaǵy qadamdardy birlesip josparlaýǵa arnalǵan quraldar usynylady.
Áleýmettik qyzmetkerlerdiń beıindi mamandarmen ózara is-qımylyna jáne kórsetilgen qoldaýdyń nátıjesin baǵalaýǵa da erekshe nazar aýdarylmaq.
Qazirgi ýaqytta Ulttyq áleýmettik qorǵaý salasyn damytýdyń ǵylymı ortalyǵy ASB bar balalardy tárbıelep otyrǵan otbasylarmen áleýmettik qyzmetkerlerdiń jumys isteý tájirıbesin zerttep jatyr. Mamandar qoldanystaǵy tásilderdi taldap, ata-analar men áleýmettik qyzmetkerlerdiń qajettilikterin, sondaı-aq kúndelikti jumysta paıdalanýǵa bolatyn praktıkalyq quraldardy anyqtaýda.
Aıta keteıik, DSM aýtızmdi emdeýde naqty medıtsınaǵa júginýge shaqyrdy.
