Áleýmettik qyzmet kórsetý júıesi jan basyna shaqqandaǵy qarjylandyrýǵa kóshti - mınıstrlik
ASTANA. KAZINFORM — QR Eńbek jáne halyqty áleýmettik qorǵaý vıtse-mınıstri Vıktorııa Shegaı múgedektigi bar adamdardy jumyspen qamtamasyz etýge qatysty pikir aıtty.
- Qazirgi ýaqytta ekonomıkada 127,8 myńǵa jýyq múgedektigi bar adam nemese eńbekke qabiletti jastaǵy azamattardyń 30 paıyzy jumys isteıdi. Múgedektigi bar adamdardy jumyspen qamtý úshin járdemdesýdiń belsendi sharalaryn iske asyrý, josparlanǵan kvota aıasynda turaqty jumys oryndaryna ornalastyrý, sondaı-aq arnaıy jumys oryndaryna ornalastyrý eskerilgen, - dedi V. Shegaı Ortalyq kommýnıkatsııalar qyzmetindegi baspasóz máslıhatynda.
Sonymen qatar ol 2025 jyldan bastap elimizde áleýmettik qorǵaý salasynda arnaýly áleýmettik qyzmetter kórsetetin uıymdardy lıtsenzııalaý engizilgenin eske saldy. Bıylǵy 1 jeltoqsandaǵy jaǵdaı boıynsha 582 uıymnyń lıtsenzııasy bar, olardyń qyzmetterimen 94 myńnan astam adam qamtylǵan.
- Búginde áleýmettik qyzmet kórsetý júıesi jan basyna shaqqandaǵy qarjylandyrýǵa kóship jatyr. Bul arnaýly áleýmettik qyzmetter kórsetetin ortalyqtar jelisin keńeıtýge jáne olardy shalǵaıdaǵy aýyldyq eldi mekenderge jetkizýge múmkindik beredi. Qazir arnaýly áleýmettik qyzmetter kórsetetin uıymdarmen 369 shart jasalǵan, - dedi vıtse-mınıstr.
Onyń sózine qaraǵanda, Memleket basshysynyń tapsyrmasyna sáıkes elimizdiń 12 óńirinde: Aqmola, Aqtóbe, Atyraý, Jambyl, Batys Qazaqstan, Pavlodar, Túrkistan, Abaı jáne Jetisý oblystarynda, sondaı-aq Almaty, Astana jáne Shymkent qalalarynda ońaltý ortalyqtaryn salý is-sharalary qamtylǵan. Árbir ortalyq 150 orynǵa eseptelgen. Osy oraıda jalpy 1 850 oryn qamtamasyz etilip, 1 440 jańa jumys orny qurylady.
Budan buryn habarlanǵandaı, 2026 jyldan múgedektigi bar jandarǵa járdemaqy 10 paıyzǵa ósedi. Qazirgi ýaqytta Qazaqstanda 750 myńnan astam adamnyń múgedektigi bar. Sonyń arasynda 18 jastan asqan eresekter sany 630 myńnan astam nemese 84 paıyzy, al múgedektigi bar balalardyń sany – 120 myń.
