Áleýmettik kepildikterdi qorǵaý: azamattyq-quqyqtyq shart jasaýǵa tyıym salynady

ASTANA. KAZINFORM — Kóptegen jumys berýshiler áleýmettik kepildikterden jaltaryp júr. Bul týraly Májilistiń jalpy otyrysynda jumysshylardyń quqyqtaryn qorǵaýǵa arnalǵan zań jobasyn birinshi oqylymda talqylaý kezinde depýtat Ashat Aımaǵambetov málim etti.

- Birinshiden, azamattyq-quqyqtyq sharttar problemasy bar. Másele nede? Elimizde kóptegen jumys berýshiler qarjysyn únemdeý jáne áleýmettik kepildikterden jaltarý úshin, eńbek shartynyń ornyna azamattyq-quqyqtyq shart jasasýdy ábden ádetke aınaldyrdy. Jumysker jumys tártibine baǵynady, jumys kestesine sáıkes jumys isteıdi, bastyǵy bar, biraq qaǵaz júzinde ol – «qyzmetker» emes, «merdiger» sanalady. Bul nege qaýipti? Óıtkeni bul azamattyq-quqyqtyq shartta otyrǵan jumysker áleýmettik kepildikterden aıyrylady. Ol eńbek demalysyna shyǵa almaıdy. Áıelder de júktilikke baılanysty demalysqa shyǵa almaıdy. Zeınetaqy jarnasy aýdarylmaıdy, medıtsınalyq saqtandyrýy bolmaıdy. Endi biz buǵan naqty tosqaýyl qoıamyz, - dedi A. Aımaǵambetov.

Onyń aıtýynsha, eger qarym-qatynasta eńbek shartynyń kem degende bir belgisi bolsa, onda azamattyq-quqyqtyq shart jasasýǵa tyıym salynady.

- Nátıjesinde, on myńdaǵan adam tolyqqandy áleýmettik kepildikterge ıe bolady, - dedi depýtat.

Aıta keteıik, buǵan deıin jumysker eńbek shartynda kózdelmegen fýnktsııalardy oryndaýdan bas tartýǵa quqyly ekenin jazǵan edik.