Áleýmettik kepildikter endi kásibı táýekel deńgeıine baılanysty beriledi

Eńbek jáne halyqty áleýmettik qorǵaý mınıstrliginde mınıstr Asqarbek Ertaevtyń tóraǵalyǵymen apparattyq keńes ótti. Jıyn barysynda zııandy eńbek jaǵdaılarynda jumys isteıtin azamattarǵa beriletin áleýmettik kepildikter júıesin jańǵyrtý, jumyspen qamtý salasynyń ózekti máseleleri, sondaı-aq quqyqtyq bazanyń elimizdiń jańartylǵan Konstıtýtsııasynyń normalaryna sáıkestigi qaraldy.

Negizgi baıandamamen QR EHÁQM Eńbekti qorǵaý jónindegi respýblıkalyq ǵylymı-zertteý ınstıtýtynyń bas dırektory Lıazat Aqtaeva sóz sóıledi. Onyń aıtýynsha, qazirgi ýaqytta elimizde zııandy eńbek jaǵdaılarynda jumys isteıtin azamattar úshin alty túrli kepildik qarastyrylǵan. Olardyń qatarynda qysqartylǵan jumys ýaqyty, qosymsha eńbek demalysy, eńbekke joǵary mólsherde aqy tóleý, mindetti kásiptik zeınetaqy jarnalary, sút jáne emdik-profılaktıkalyq taǵamdarmen qamtamasyz etý bar.

— Búginde elimizde zııandy óndiristik ortada eńbek etetin 477 myńǵa jýyq azamat bar. Sońǵy bes jyl ishinde jumys berýshilerdiń olarǵa beriletin áleýmettik kepildikterdi qarjylandyrýǵa baǵyttaǵan shyǵyndary 140,1 mlrd teńgeden eki eseden de kóp artyp, 310,9 mlrd teńgege deıin ósti, — dep atap ótti Lıazat Aqtaeva.

Baıandamashy qoldanystaǵy júıeniń negizgi kemshiligi retinde onyń «tizimdik» qaǵıdatqa negizdelgenin atap ótti. Qazirgi tańda jeńildikter naqty jumys ornyndaǵy eńbek jaǵdaıyna qaraı emes, bekitilgen tizimderdegi mamandyq ataýlary boıynsha beriledi. Bul áleýmettik kepildikterdi usynýda teńgerimsizdikke alyp kelip, salalyq kelisimderdegi tásilderdiń ártúrli bolýyna jáne normatıvtik alshaqtyqtyń qalyptasýyna sebep bolyp otyr. Búginde negizgi kásipter tizimderi arasyndaǵy avtomatty sáıkestik deńgeıi nebári 59%.

Júıeni jańǵyrtý maqsatynda Eńbek mınıstrligi táýekelge baǵdarlanǵan biryńǵaı modelge kóshýdi pysyqtap jatyr. Bolashaqta zııandy eńbek jaǵdaılarynda jumys isteıtin azamattarǵa beriletin áleýmettik kepildikter kólemi kásibı táýekel deńgeıine (tómennen óte joǵary deńgeıge deıin) tikeleı baılanysty bolady.

Mańyzdy qadamdardyń biri retinde kásipter men olarǵa baılanysty áleýmettik kepildikterdiń biryńǵaı tsıfrlyq tizilimin qurý kózdelip otyr. Bul úderisterdi avtomattandyrýǵa, qabyldanatyn sheshimderdiń ashyqtyǵyn arttyrýǵa jáne qoldaý sharalarynyń ataýlylyǵyn qamtamasyz etýge múmkindik beredi.

Ortaq ári teńgerimdi ustanym qalyptastyrý maqsatynda atalǵan usynystar memleket, jumys berýshiler jáne kásipodaqtar ókilderiniń qatysýymen ótetin Respýblıkalyq úshjaqty komıssııanyń jumys tobynyń qaraýyna shyǵarylatyn bolady.

Sonymen qatar keńes barysynda QR EHÁQM qurylymdyq bólimsheleriniń basshylary aǵymdaǵy mindetterdiń oryndalýy jóninde esep berdi. Halyqty jumyspen qamtý departamentiniń dırektory Tóleý Muhtar oqýshylar men stýdentterdiń ýaqytsha jumyspen qamtylýyn uıymdastyrý jáne olardyń quqyqtaryn qorǵaý máseleleri jóninde aqparat berdi. Vedomstvonyń keńeıtilgen alqa otyrysynda berilgen tapsyrmalardyń oryndalýy men QR Konstıtýtsııasynyń jańartylǵan normalaryn iske asyrý barysyn departament dırektorlary Erbolat Ábilhatın men Serik Berkamalov tanystyrdy.

Keńes qorytyndysy boıynsha mınıstr Asqarbek Ertaev mindettemelerdiń oryndalýyna baqylaýdy kúsheıtý jáne eńbekti qorǵaý salasyn tsıfrlandyrý jumystaryn jedeldetý jóninde naqty tapsyrmalar berdi.

Aıta ketelik shopandar zııandy jaǵdaıda eńbek etetin jumysshylar tizimine enetini týraly jazǵan edik.