Áleýmettik-kásipkerlik korporatsııalarǵa ınvestorlar tarapynan senim joq — Sabılıanov
ASTANA. KAZINFORM — Áleýmettik-kásipkerlik korporatsııalar básekege qabiletsiz jáne qomaqty boryshtyq mindettemeleri bar. Bul týraly Májilistiń jalpy otyrysynda depýtat Nurtaı Sabılıanov aıtty.
— Áleýmettik-kásipkerlik korporatsııalardyń aımaqtarda 20 jylǵa jýyq qyzmeti ekonomıkanyń qajetti aýqymda damýyna túbegeıli áser etpedi. Tek sońǵy 5 jylda 13 óńirlik Áleýmettik-kásipkerlik korporatsııaǵa kredıt berýge 288,6 mlrd teńge bıýdjet qarajaty bólindi. Qazirgi ýaqytta korporatsııalardyń qyzmetin retteıtin strategııalyq qujat joq. Bul rette qoldanystaǵy zańnamada jalpy normalar qamtylǵan. Mundaı jaǵdaı baqylaýdyń bolmaýyna, bıýdjet qarajaty men memlekettik aktıvterdi tıimsiz paıdalanýǵa, sondaı-aq qarjylyq buzýshylyqtarǵa alyp keldi, — dedi májilismen.
Onyń málimetinshe, 13 Áleýmettik-kásipkerlik korporatsııaǵa júrgizilgen aýdıt boıynsha mynadaı kemshilikter anyqtalǵan:
— 137,9 mlrd teńgege qarjylyq buzýshylyqtar;
— 33,6 mlrd teńgege bıýdjet qarajaty men aktıvterin tıimsiz paıdalaný.
— Memleket 13 korporatsııanyń jarǵylyq kapıtalyn tolyqtyrý úshin 596,3 mlrd teńge bóldi. Biraq osyǵan qaramastan, jyldan jylǵa olardyń shyǵyndylyǵy máselesi saqtalýda. 2024 jyldyń sońynda 13 korporatsııanyń 8-iniń jabylmaǵan shyǵyny 209,5 mlrd teńgeni qurady. Korporatsııalar negizgi kiristi alynǵan bıýdjet qarajatyn bankterdegi depozıtterge ornalastyrýdan jáne kásipkerlik sýbektilerine qaryz berýden alady. Sondaı-aq, Áleýmettik kásipkerlik korporatsııalar, kóbinese, kásipkerlik sýbektileri men «Azyq-túlik kelisimshart korporatsııasy» Ulttyq kompanııasy» aktsıonerlik qoǵamy arasyndaǵy mámilelerde kepilger retinde áreket etedi. Bul únemi tıimdi bola bermeıdi. Olardyń ınvestıtsııalyq qyzmeti is júzinde tereń quldyraý kezeńinde. Investorlar tarapynan kópten beri senim joq, — dedi Nurtaı Sabılıanov.
Onyń aıtýynsha, korporatsııalar jarǵylyq kapıtaldy qalyptastyrý jáne tolyqtyrý arqyly ózderiniń menshigine ótetin kommýnaldyq menshik obektilerine qol jetkize alady.
— Budan ári osy aktıvterdi basqarý, onyń ishinde ıelikten shyǵarý ashyq emes jaǵdaılarda, Áleýmettik-kásipkerlik korporatsııalardyń qalaýy boıynsha jáne jergilikti atqarýshy organmen mindetti túrde kelisilmeı júzege asyrylady. Korporatsııalardyń jer ýchaskelerine menshik quqyǵynan bas tartý faktileri de bar. Budan basqa, Áleýmettik kásipkerlik korporatsııalar rentabeldi emes enshiles uıymdar quryp, keıinnen olardyń qyzmeti toqtatylady. Osylaısha, taldaý kórsetkendeı korporatsııalar básekege qabiletsiz jáne qomaqty boryshtyq mindettemeleri bar, — dedi ol.
Sondyqtan Nurtaı Sabılıanov Úkimetke:
— Áleýmettik-kásipkerlik korporatsııalardyń qyzmetin retke keltirýdi jáne onyń tıimdiligin qamtamasyz etýdi;
— ýákiletti memlekettik organdy aıqyndaýdy;
— olardyń qyzmetin tolyq tsıfrlandyrýdy qamtamasyz etýdi;
— qarjylyq buzýshylyqtarǵa jol bergen tulǵalardy jaýapkershilikke tartýdy;
— enshiles kásiporyndar qurýǵa tyıym salýdy;
— korporatsııalarǵa berilgen múlikti, jer ýchaskelerin memleket menshigine qaıtarýdy jáne maqsatsyz paıdalanylǵan bıýdjet qarajatyn qaıtarýdy qamtamasyz etýdi usyndy.
Aıta keteıik, Májilistiń jalpy otyrysynda depýtattar Joǵary aýdıtorlyq palatanyń jeke kásipkerlerge memlekettik qoldaý sharalarynyń tıimdiligine qatysty esebin tyńdap otyr.