Áleýmettik kásipkerlik granty kimderge beriledi

ASTANA. KAZINFORM — Áleýmettik kásipkerlikti qoldaý maqsatynda memlekettik granttar bólinedi. Granttar baıqaýy bıyl qazanda ótedi.

Bul týraly Astana qalasynyń ınvestıtsııalar jáne kásipkerlikti damytý basqarmasy basshysynyń orynbasary Qýanysh Saparov málim etti.

— Granttar «Áleýmettik kásipkerlik sýbektilerine memlekettik granttar berý qaǵıdalaryn bekitý týraly» Úkimettiń 2024 jylǵy 17 qyrkúıektegi № 754 qaýlysyna sáıkes óteýsiz negizde beriledi. Negizgi sharttary grant somasynyń keminde 20%-yn kásipker ózi qarjylandyrýy tıis, mindetti túrde jumys ornyn quryp, eńbek portalyna tirkeý qajet, sondaı-aq ınfraqurylymnyń bolýy talap etiledi. Osy oraıda, grant baıqaýyna qatysý úshin áleýmettik kásipkerler tizilimine enýi qajet. Qarjylyq qoldaý sharalary aıasynda áleýmettik kásipkerlerdiń reestri júrgiziledi, — dedi Qýanysh Saparov Astana qalasy kommýnıkatsııalar qyzmeti alańynda ótken baspasóz máslıhatynda.

Áleýmettik kásipkerlerdiń tizilimin júrgizý qaǵıdasy 4 sanatqa bólingen: 

— 1 sanat — halyqtyń áleýmettik osal tobynan shyqqan azamattardy jumyspen qamtýǵa yqpal etetin áleýmettik kásipkerler (keminde 2 adam, qyzmetkerlerdiń jalpy sanynyń 50% kem bolmaýy tıis). Halyqtyń áleýmettik osal toby sanatyna kelesideı azamattar jatady, erekshe qajettiligi bar azamattar, erekshe bala tárbıelep otyrǵan ata-ana, kópbalaly otbasy ókilderi, zeınetkerler men zeınet aldy jastaǵy azamattar, 16 men 23 jas aralyǵyndaǵy balalar úıiniń tárbıelenýshileri, qandastar.

— 2 sanat — halyqtyń áleýmettik osal toby sanatyna jatatyn azamattar óndiretin taýarlardy, oryndaıtyn jumysty, kórsetetin qyzmetti ótkizýdi qamtamasyz etetin áleýmettik kásipkerler.

— 3 sanat — fızıkalyq múmkindigi shekteýli jandarǵa arnap taýar óndirýmen, jumys atqarýmen, qyzmet kórsetýmen aınalysatyn áleýmettik kásipkerler. Bul qyzmet túri olardyń ómir súrý shekteýlerin eńserýge jaǵdaı jasaýǵa baǵyttalǵan (áleýmettik-medıtsınalyq, áleýmettik-psıhologııalyq qyzmet, ońaltý jáne áleýmettik beıimdeý).

— 4 sanat — áleýmettik salada jumys isteıtin áleýmettik kásipkerler (psıhologııalyq-pedagogıkalyq qyzmet, balalardyń demalysy men saýyqtyrý uıymdastyrý, jalpy bilim berý, mádenı-aǵartýshylyq qyzmet, qorshaǵan ortany qorǵaý).

— Byltyr maýsymdaǵy jaǵdaı boıynsha áleýmettik kásipkerlerdiń tizilimine respýblıka boıynsha 1094 kásipkerdiń ishinen 215 kásipker engizilgen, onyń ishinde 1 sanat boıynsha — 13 kásipker, 2 sanat — 1, 3 sanat — 40, 4 sanat — 161 kásipker bar. Atalǵan tizimge engen kásipkerler memlekettik granttar alý konkýrsyna jáne «Damý» qory arqyly 11,3% mólsherlememen jeńildetilgen nesıeleý baǵdarlamasyna qatysa alady, — dep qorytyndylady basqarma basshysynyń orynbasary.

Onyń aıtýynsha, ótinim ár toqsan saıyn aıdyń 1-inen 15-ine deıin oflaın formatta Beıbitshilik kóshesi, 11 úı, 113-kabınet mekenjaıda qabyldanady.

Kásipkerlikti qoldaý boıynsha tolyq aqparatty Astana qalasynyń Investıtsııalar jáne kásipkerlikti damytý basqarmasynan kelesi telefon nómirleri arqyly alýǵa bolady: 55-69-10, 55-01-81, 55-69-21. 

Aıta keteıik, bıyl shildede bıznes sýbsıdııany kepildendirýdiń jańa tetikteri kúshine enedi. 

Búginde Astanada shaǵyn jáne orta bıznes sýbektileri 8,3 paıyzǵa kóbeıdi. Elordada ótken jyly shaǵyn jáne orta bıznes sýbektileri 15,8 trln teńgege taýar óndirip, qyzmet kórsetken.