Áleýmettik ınfraqurylym bala sanyna sáıkes kelmeıtini ras – Astana ákimi

Elordada eki jylda 50-ge jýyq jańa mektep paıda bolady. Bul týraly Astana qalasynyń ákimi Jeńis Qasymbek aıtty, dep habarlaıdy Kazinform.

Búgin elordada ákimniń kásipkerlermen kezdesýinde Májilis depýtaty Oljas Quspekov qalada qurylys qarqyndy júrip jatqanyna baılanysty áleýmettik ınfraqurylymǵa júkteme aıtarlyqtaı artqanyn aıtty. Osy oraıda depýtat qaladaǵy demografııalyq ósim aıasynda bilim berý nysandaryndaǵy oryn tapshylyǵy qalaı sheshiletinin surady.

Óz kezeginde Astana basshysy qala turǵyndary jyl saıyn kem degende 60 myń adamǵa artyp otyrǵanyn atap ótti.

«Onyń jartysy bala týý esebinen bolsa, qalǵany elimizdiń basqa óńirlerinen qonys aýdarýynan tolyǵyp otyr. Sondyqtan qalada áleýmettik jáne ınjenerlik ınfraqurylym jaǵynan máseleler bar. Máselen, jazda sýǵa qatysty problema boldy. Keıingi jyldary qys kezinde jylý berý maýsymynda elektr energııasy boıynsha tıisti shekteý baıqaldy. Áleýmettik ınfraqurylym qaladaǵy balalardyń sanyna sáıkes kelmeıtini de ras», – dedi J. Qasymbek.

Shahar ákiminiń aıtýynsha, bıyl elordada dúnıege kelgen nárestelerdiń sany 35 myńǵa jetýi yqtımal.

«Jańa oqý jylynda birinshi synypqa 26 myń búldirshin bardy. Bizde 25 myń oqýshy orny jetispeıdi. Qalada úsh aýysymdaǵy 8 mektep bar ekenin de eskerý kerek. Qazir «Jaıly mektep» baǵdarlamasy júzege asyrylyp jatyr. Kelesi oqý jyly qarsańynda 24 mektep paıdalanýǵa beriledi. Al bıyl 10 mektepti tapsyrý eskerilgen. Taǵy 8 mektepti ózimiz salamyz, sondaı-aq 17 jekemenshik mekteptiń qurylysy júrip jatyr. Jalpy, eki jylda 50-ge jýyq jańa mektep paıda bolady. Osy oraıda oryn tapshylyǵyn joıamyz», – dedi ákim.

Astana ákiminiń sózine qaraǵanda, qalada 5-7 myń pedagog jetispeıdi.