Áleýmettik-eńbek salasynda 18 myńnan astam ótinishti JI negizindegi chat-bot óńdedi
ASTANA. KAZINFORM – QR Eńbek jáne halyqty áleýmettik qorǵaý mınıstrliginiń «Enbek» tsıfrlyq ekojúıesi aıasynda áleýmettik-eńbek salasy boıynsha baılanys ortalyǵy jumys isteıdi.
Osy jyldyń sáýir aıynda azamattarmen keri baılanysty jedeldetý jáne operatorlarǵa túsetin júktemeni azaıtý maqsatynda ıntellektýaldy chat-bot iske qosyldy. 1 qyrkúıektegi jaǵdaı boıynsha jasandy ıntellekt 18,7 myń ótinishti óńdegen.
Intellektýaldy chat-bot azamattar men baılanys ortalyǵy arasyndaǵy bastapqy ózara áreketti avtomattandyrýǵa arnalǵan. Ol paıdalanýshylarǵa anyqtamalyq aqparat beredi, jıi qoıylatyn suraqtar boıynsha keńes beredi, sondaı-aq qajet bolǵan jaǵdaıda ótinishterdi tıisti bólimderge joldaıdy.
Chat-bot biryńǵaı kirý núktesi retinde qyzmet etip, myna múmkindikterdi qamtamasyz etedi:
memlekettik qyzmetter men áleýmettik qoldaý sharalary týraly aqparatty jedel usyný;
tsıfrlyq platformalarda baǵdar alýǵa kómek kórsetý.
Júıege tıptik ótinishterge avtomatty túrde jaýap berýge múmkindik beretin bilim qory júktelgen. Chat-bot qazaq jáne orys tilderinde jumys isteıdi.
- Jańa tehnologııany engizý suranystardy óńdeý jyldamdyǵyn arttyrýǵa, operatorlar júktemesin azaıtýǵa jáne azamattarǵa kórsetiletin qyzmet sapasyn jaqsartýǵa jol ashty. Qazirgi tańda mátindik jáne daýys arqyly berilgen ótinishterdi qosa alǵanda, barlyq ótinishterdiń 96%-ǵa deıingi bóligi jasandy ıntellekt arqyly avtomatty túrde óńdelýde, - dep jazdy vedomstvodan.
Eske sala keteıik, Memleket basshysy bıylǵy 8 qyrkúıektegi Qazaqstan halqyna Joldaýynda tsıfrlandyrýdy jedeldetýdi jáne jasandy ıntellektini keńinen engizýdi tapsyrǵan bolatyn.
Aıta keteıik, Jasandy ıntellekt jáne tsıfrlyq damý mınıstrligi quryldy.