Áleýmettik baqylaý kúsheıdi: 28,8 mln teńgege aıyppul salyndy
ASTANA. KAZINFORM — 2025 jyldyń basynan beri áleýmettik ınspektorlar halyqtyń áleýmettik osal toptarynyń quqyqtaryn qorǵaý maqsatynda 430 nysanda tekserý júrgizdi. Onyń ishinde 201-i – jospardan tys, 99-y – profılaktıkalyq baqylaý aıasynda, al 130-y – prokýratýra tapsyrmasy boıynsha ótken. Bul týraly Eńbek jáne áleýmettik qorǵaý mınıstrligi málim etti.
Tekserýler nátıjesinde 192 uıǵarym berilip, 28,8 mln teńgeden astam somaǵa 341 aıyppul salyndy. Baqylaý balabaqshalar, mektepter, aýrýhanalar, saýda oryndary, kólik ınfraqurylymy, áleýmettik mekemeler jáne mádenıet uıymdaryn qamtydy.
Pavlodar oblysy boıynsha eńbek jáne halyqty áleýmettik qorǵaý departamenti birneshe nysanda jospardan tys tekserýler júrgizip, birqatar buzýshylyqtardy anyqtady. Mysaly, áleýmettik qyzmetter portalyna jetkizýshilerdi tirkeý tártibin buzǵan mekemege uıǵarym shyǵaryldy.
Sonymen qatar, óńirlerde áleýmettik ınfraqurylymdy múgedektigi bar azamattarǵa beıimdeý boıynsha oń ózgerister baıqalýda. Pavlodar qalasynyń turǵyndary birqatar medıtsınalyq jáne sport mekemelerinde pandýstar, taktıldi jolaqtar, arnaıy sanıtarlyq bólmeler syndy qoljetimdi orta qalyptasyp kele jatqanyn atap ótti.
Bul rette áleýmettik ınspektorlardyń aıtýynsha barlyq óńirlerde múgedektigi bar adamdar úshin áleýmettik ınfraqurylymdy beıimdeýdegi oń ózgerister bar. Muny erekshe qajettilikteri bar adamdar da rastaıdy.
– Máselen, №3 jáne №4 qalalyq emhanalardyń aýmaǵynda múgedekterge arnalǵan kólikter turaǵy bar, al kireberis pandýstarmen jabdyqtalǵan. Emhana ǵımarattarynyń kireberisine kózi nashar kóretinder úshin mnemoshemalar, ǵımarattardyń ózinde taktıldi jolaqtar jáne múmkindigi shekteýli jandarǵa arnalǵan sanıtarlyq-turmystyq bólmeler qarastyrylǵan. «Baıantaý» sport saraıy, «Avtomobılıst» sport kesheni, «Olimpic» basseıni, erekshe qajettilikteri bar adamdardyń sportpen shuǵyldanýyna barlyq jaǵdaı jasalǵan sport nysandary, – dep bólisti Pavlodar qalasynyń turǵyny, birinshi toptaǵy múgedek ıÝlııa Petrýseva.
Buǵan deıin habarlanaǵndaı, Qazaqstandyqtar 310 mlrd teńge somada járdemaqy men áleýmettik tólem aldy.