Áleýmettik aýdarymdar túspese, qaıda júginý kerek
ASTANA. KAZINFORM — Aýdarymdar aı saıyn esepti aıdan keıingi aıdyń 25-inen keshiktirilmeı júrgizilýge tıis.
Eńbek jáne halyqty áleýmettik qorǵaý mınıstrligi jumyskerler jumys berýshiniń ózderi úshin Memlekettik áleýmettik saqtandyrý qoryna áleýmettik aýdarymdardy aýdaryp otyrǵanyn óz betinshe teksere alatynyn eske salady. Bul týraly málimetterdi eGov.kz portaly, jekelegen bankterdiń mobıldi qosymshalary arqyly, sondaı-aq HQKO-ǵa nemese Qordyń fılıalyna jeke júginý arqyly alýǵa bolady.
Áleýmettik aýdarymdardyń ýaqtyly ári tolyq tólenýi jumys isteıtin azamattardyń áleýmettik qorǵalýynda mańyzdy ról atqarady. Osy aýdarymdar negizinde adamnyń tabysy men mindetti áleýmettik saqtandyrý júıesine qatysý uzaqtyǵy eskeriledi. Bul kórsetkishter tıisti áleýmettik tólemderdi alý quqyǵyn aıqyndaý jáne olardyń mólsherin esepteý úshin qajet.
— Jalpy tártip boıynsha jumys berýshiler jumyskerler úshin áleýmettik aýdarymdardy óz qarajaty esebinen tóleıdi. Ol jumyskerdiń jalaqysynan ustalmaıdy. Áleýmettik aýdarymdardyń mólsherlemesi zańnamaǵa sáıkes olardy esepteý úshin qabyldanatyn tabystyń 5%. Aýdarymdar aı saıyn esepti aıdan keıingi aıdyń 25-inen keshiktirilmeı júrgizilýge tıis.
Mindetti áleýmettik saqtandyrý júıesi eńbekke qabilettilikten aıyrylý, jumysynan aıyrylý, júktilik pen bosanýǵa, jańa týǵan balany asyrap alýǵa, sondaı-aq bala bir jarym jasqa tolǵanǵa deıin onyń kútimine baılanysty tabystan aıyrylý jaǵdaılarynda áleýmettik tólemder alýdy kózdeıdi. Júıege qatysýshy qaıtys bolǵan jaǵdaıda, zańnamada belgilengen talaptar saqtalǵan kezde onyń asyraýyndaǵy otbasy músheleri asyraýshysynan aıyrylý jaǵdaıy boıynsha áleýmettik tólem alýǵa quqyly, — delingen mınıstrlik habarlasynda.
Áleýmettik tólemderdiń mólsheri áleýmettik táýekeldiń túrine, áleýmettik aýdarymdar júrgizilgen tabys mólsherine jáne júıege qatysý uzaqtyǵyn qosa alǵanda, zańnamada kózdelgen ózge de ólshemsharttarǵa baılanysty aıqyndalady.
Aýdarymdardy tekserý úshin eGov.kz portalynda «Mindetti áleýmettik saqtandyrý júıesine qatysýshyǵa áleýmettik aýdarymdardyń jaǵdaıy men qozǵalysy týraly aqparat berý» qyzmetin paıdalaný qajet. Ol úshin paıdalanýshy qajetti málimetter qamtylatyn kezeńdi tańdap, elektrondyq suraý salýdy joldaıdy. Nátıjeni jeke kabınetten kórýge bolady.
Sondaı-aq málimetterdi jekelegen bankterdiń mobıldi qosymshalaryndaǵy «Memlekettik qyzmetter» bóliminen alýǵa bolady. HQO-ǵa nemese MÁSQ fılıalyna júgingen kezde jeke basty kýálandyratyn qujatty kórsetý qajet. Bul aqparat aýdarylǵan somalar men qarajat túsken kezeńderdi tekserýge múmkindik beredi.
Eger jekelegen aılar boıynsha áleýmettik aýdarymdar túspegeni anyqtalsa nemese olardyń mólsherine qatysty suraqtar týyndasa, málimetterdi salystyryp tekserý úshin jumys berýshige nemese býhgalterııaǵa júginý qajet. Jumys berýshi áleýmettik aýdarymdardy tóleý jónindegi mindettemesin oryndamaǵan jaǵdaıda, jumysker olardyń tolyq ári ýaqtyly aýdarylýyn baqylaýdy júzege asyratyn memlekettik kirister organdaryna ótinish berýge quqyly.
Áleýmettik tólemderge qatysty keńesti MÁSQ fılıaldarynan jáne 1414 biryńǵaı baılanys ortalyǵynan alýǵa bolady. Áleýmettik aýdarymdardy turaqty túrde tekserý olardyń ýaqytyly túspeýin nemese málimetterdegi sáıkessizdikterdi der kezinde anyqtap, áleýmettik táýekel týyndaǵanǵa deıin tıisti sharalar qabyldaýǵa múmkindik beredi.
