«Áleýmettik ámııan»: 6 760 mektepte tamaqtaný esebi onlaın júrgiziledi

ASTANA. KAZINFORM — 6 760 mektep mekteptegi tamaqtanýdy «Áleýmettik ámııan» arqyly tsıfrlyq esepke alýǵa kóshti, dep habarlaıdy Oqý-aǵartý mınıstrliginiń baspasóz qyzmeti.

Qazaqstanda 6 760 jalpy bilim beretin mektepte oqýshylarǵa beriletin tegin jáne jeńildetilgen tamaqty esepke alý úshin «Áleýmettik ámııan» tsıfrlyq quralyna kóshý aıaqtaldy. Joba 2023 jyldan bastap kezeń-kezeńimen iske asyrylyp keledi, al mekteptegi tamaqtaný baǵyty 2024 jyldan bastap engizilip jatyr.

— Qural ashanaǵa barýdy tirkeý arqyly tamaq alý faktisin avtomatty túrde esepke alýdy qamtamasyz etedi. Jetkizýshilermen esep aıyrysý tek naqty berilgen tamaq úshin júrgiziledi. Bul mektepke kelmegen balalar úshin qarajat esepteýdi boldyrmaıdy. Jeńildik alý quqyǵy memlekettik organdardyń tsıfrlyq júıelerimen ıntegratsııa arqyly rastalady. Ata-analardyń derekterdi óńdeýge kelisimi bolǵan jaǵdaıda vaýcherler avtomatty túrde qalyptastyrylady, — delingen mınıstrlik habarlamasynda.

Alýshylar sanaty ózgergen joq. 1-4 synyp oqýshylary áleýmettik mártebesine qaramastan tegin tamaq alady. Joǵary synyptarda jeńildik jetim jáne ata-anasynyń qamqorlyǵynsyz qalǵan balalarǵa, múgedektigi bar adamdarǵa, kópbalaly jáne az qamtylǵan otbasylardyń balalaryna, sondaı-aq zańnamada kózdelgen ózge de sanattarǵa beriledi.

Mektepter apparattyq-baǵdarlamalyq keshendermen jabdyqtalyp, «Bıznes-ámııan» qosymshasyna qosyldy. Jabdyqtaý jergilikti atqarýshy organdardyń qarajaty esebinen qarjylandyrylady. «Áleýmettik ámııandy» qoldaný eseptiń ashyqtyǵyn qamtamasyz etýge jáne bıýdjet qarajatyn tıimdi paıdalanýǵa baǵyttalǵan.

Osyǵan deıin Býrabaıda mektep dırektory ashanadaǵy tekseristen keıin qyzmetinen bosatylǵany belgili boldy.