Áleýmettik ámııan: 13 mln-nan astam dári-dármek retsepti tsıfrlyq túrde berildi
ASTANA. KAZINFORM — «Áleýmettik ámııan» tsıfrlyq servısi engizilgen sátten bastap azamattarǵa yńǵaıly tsıfrlyq formatta dári-dármek berý boıynsha 13 mln-nan astam qyzmet kórsetildi, dep habarlaıdy Densaýlyq saqtaý mınıstrliginiń baspasóz qyzmeti.
Vedomstvo atap ótkendeı, bul ambýlatorııalyq dárilik qamtamasyz etý (ADQ) sheńberinde jazylǵan barlyq taǵaıyndaýdyń 81,2%-yn quraıdy.
— Jobaǵa búkil el boıynsha 708 medıtsınalyq uıym qosylǵan. Dári-dármekpen qamtamasyz etýdiń jalpy deńgeıi e-Densaulyq, Halyk, VTsK, Face ID jáne SMS-kod tsıfrlyq tetikteri arqyly jiberilgen retseptterdi qosa alǵanda, 85,1%-ǵa jetti. Retseptterdiń 14,9%-y burynǵy qaǵaz formatynda oryndalady — bul smartfondary men ınterneti joq azamattar, sondaı-aq mobıldiligi tómen azamattar, qarttar men balalar úshin mańyzdy, — delingen mınıstrlik habarlamasynda.
Joba Memleket basshysynyń 2024 jylǵy 2 qyrkúıektegi «Ádil Qazaqstan: Zań jáne tártip, ekonomıkalyq ósý, qoǵamdyq optımızm» Joldaýyn oryndaý sheńberinde iske asyrylyp jatyr jáne qazirdiń ózinde elimizdiń barlyq óńirlerinde qoljetimdi.
Dári-dármekti alý algorıtmi tolyǵymen avtomattandyrylǵan: Dáriger eGov mobile mobıldik qosymshasynyń «Áleýmettik ámııanynda» elektrondyq vaýcher túrinde avtomatty túrde paıda bolatyn QR DSM DQAJ-da retsept qalyptastyrady.
Patsıent dárihanada vaýcher usynady — ol QR kody retinde kórsetiledi. Provızor QR kodyn skanerleıdi jáne taǵaıyndalǵan preparattardy beredi.
Bul tsıfrlyq qyzmettiń artyqshylyqtary mynadaı:
- derekterdi qolmen engizýdi alyp tastaýǵa;
- qyzmet kórsetý ýaqytyn qysqartýtýǵa;
- dári-dármekterdi bosatýdyń ashyqtyǵy men dál baqylaýyn qamtamasyz etýge múmkindik beredi.
Osydan buryn Qazaqstanda ómirlik mańyzy bar dári-dármekterdiń 37%-y óndiriletinin jazǵanbyz.