Áleýmettik jobalar platformasyna ótinim qabyldaý merzimi uzartyldy

NUR-SULTAN. QazAqparat - «Azamattyq bastamalardy qoldaý ortalyǵy» KEAQ «ASAR» ІІІ Respýblıkalyq forýmy sheńberinde áleýmettik jobalar platformasyna ótinimder qabyldaý merzimin 31 mamyr,a deıin uzartty, dep habarlaıdy QazAqparat.

QR Aqparat jáne qoǵamdyq damý mınıstrligi, «Atameken» QR Ulttyq kásipkerler palatasy jáne «Azamattyq bastamalardy qoldaý ortalyǵy» KEAQ «ASAR» úshjaqty yntymaqtastyq ІІІ Respýblıkalyq forýmy sheńberindegi áleýmettik jobalar saıysyn jarııalaǵan bolatyn. Platformaǵa qatysýǵa jergilikti qaýymdastyqty damytýǵa, jergilikti máselelerdi sheshýge turǵyndardyń áleýetin tartýǵa jáne osy aımaqtardaǵy ómir deńgeıin kóterýge baǵyttalǵan jobalar shaqyrylady.

Platforma kelesi baǵyttar boıynsha júzege asyrylady:

- ESO-ASAR (qorshaǵan ortany qorǵaý boıynsha máselelerdi sheshýge, halyqty ekologııalyq mádenıetke baýlýǵa jáne ósip kele jatqan býynnyń ekologııalyq máseleler jaıynda bilim deńgeıin kóterýge baǵyttalǵan jobalar).

- IT-ASAR (sandyq júıege kóshirý arqyly jergilikti qaýymdastyqtyń máselelerin sheshýge baǵyttalǵan jobalar).

- INCLUSIVE-ASAR (ınklıýzıvti qoǵamdy damytýǵa baǵyttalǵan jobalar).

Platformaǵa qatysý úshin 2019 jyldyń 31 mamyry kúngi saǵat 18.00-ge deıin (Nur-Sultan ýaqytymen) [e-mail] elektrondyq poshtasyna qosymshaǵa sáıkes ótinimdi qazaq/orys tilinde jiberý qajet.

Ótinim kórsetilgen formaǵa sáıkes toltyrylady jáne ótinimge mindetti túrde slaıd (10 betke deıin), beınerolık (uzaqtyǵy 3 mınýtqa deıin), ınfografıka (5 danaǵa deıin) túrindegi prezentatsııalyq materıal tirkelýi tıis.

Barlyq ótinimder jınalǵannan keıin Azamattyq bastamalardy qoldaý ortalyǵynyń onlaın alańynda ashyq jarııalanymda bolady jáne kásipkerler arasynda taratylady.