Áleýmettik jeliniń áleýeti artqanda...
ASTANA. QazAqparat - Ǵalamtordyń ǵalamdyq keńistikte aqparat almasýdaǵy mańyzyn búgingi qoǵam aıshyqtaıdy. Internet kópshilik ómiriniń mańyzdy bóligine aınaldy desek, áleýmettik jelige, ásirese, Feısbýkke kirip, jan-jaǵyndaǵylardyń qam-qareketin baqylap, kókirek túbindegi qat-qat oılaryn ortaǵa salýǵa asyǵatyn, sosyn oıyndaǵy san túrli túıtkilderdi tógip tastaıtyn jandar da bar.
Elimizde qabyldanyp jatqan zańdar, Úkimet minberinde talqylaýǵa túsken san máseleler áleýmettik jeli paıdalanýshylarynyń nazarynan tys qalmaıdy. Jylt etken jańalyqty ilip áketip, qoǵamdyq talqylaýǵa salyp, artynan qyzý-pikirtalastar týdyryp, salmaqty oı, sanaly pikir aıtyp júrgen qoǵam belsendileri tarapynan aıtylǵan máselelerdiń úkimet nazaryna ilikkenderi de az emes. Keıbir boıjetkenderdiń túrli fotosýretterin jarııalap, ózin kórsetý úshin áleýmettik jelilerdi paıdalanatyndardyń da baryn joqqa shyǵara almaımyz. Solardyń alǵy shebine el ánshilerin qosýǵa bolady.
Buryndary ánshilerdiń ómiri qarapaıym halyqqa qyzyq edi, tyńdarmandary olardy anda-sanda teledıdardan, bolmasa tek jýrnaldardan ǵana kóretin. Al qazir áleýmettik jelilerden, ásirese Instagramda olardyń ne iship, ne jeıtini, qalaı júrip-turatyny, kimmen dos, kimmen baýyr ekendigin kórsetetin fotosýretteri kún saıyn jarııalanyp jatyr.
Qysqasy, áleýmettik jeliler búgingi kúni kez kelgen aqparat agenttiginen esh kem emes júıege aınaldy. Biz ózimizshe burysy men durysyn tarazylaǵan boldyq. Áleýmettik jelilerdiń artyq-kemi ýaqyt talabyna qaraı, qoǵamnyń saýattanýyna qaraı áli talaı ózgeretin bolady. Memleket tarapynan qarastyrylyp otyrǵan zańdarda áleýmettik jelidegi beıádep dúnıelerdi tyıyp, halyqtyń saýatty dúnıelerdi tutynýyna sebepker bolady. Bir jaǵynan, dáriger mamandardyń da áleýmettik jeliler adamdar arasyndaǵy tiri ári shynaıy qarym-qatynasty buzady deıtini de oryndy sııaqty. Bul aqparatty tutynyp áleýmettik jelini paıdalanýdyń shegi de bar ekendigin kórsetedi. Endeshe, aqıqatyn tarazylap, bilimniń tunyǵyn tutyný órkenıetke umtylǵan kez kelgen azamattyń óz úlesindegi sharýa.
