Áleýmettik jelini shýlatqan 5 jasar avtoınspektorǵa polıtseıler syılyq berdi
QARAǴANDY. QazAqparat – Qaraǵandy oblysynda 5 jasar bala polıtseı kıimin kıip, jol qozǵalysyn rettedi. Jas avtoınspektor týraly beınerolık áleýmettik jelilerdi dúrkiretti. Merekelik demalys kúnderi bala tártip saqshysy formasyn kıip, birneshe saǵatqa jol qozǵalysyn retteýshige aınaldy, dep habarlaıdy QazAqparat tilshisi.
23 naýryzda Instagram áleýmettik jelisinde beınerolık jarııalandy.
Onda polıtsııa kıimin kıgen kishkentaı bala jol jıeginde turyp, Shet aýdany Aqsý–Aıýly aýyly kósheleriniń birinde jol qozǵalysyn rettegenin kórýge bolady.
Polıtseıler jas avtoınspektordyń kim ekenin anyqtady. Ol bastaýysh synypta oqıtyn 5 jasar Baǵdáýlet Aǵzamov bolyp shyqty.
Balanyń ákesi Baǵdáýlettiń úsh jasynan bastap polıtsııa qyzmetkeri bolýdy armandaǵanyn aıtty.
Eń qyzyǵy búldirshinniń ata-anasy quqyq qorǵaý organdaryna qatysymyz joq deıdi. Olar aýdan ortalyǵynda óz isin dóńgeletip júrgen kásipkerler.
23 naýryzda ákesi ulyna polıtsııa qyzmetkeriniń formasyn satyp alǵan bette, bala óz armanyna bir qadam jaqyndanǵanyna qýanǵan eken.
Baǵdáýlet birden jańa formasyn kıip, kóshege shyqqan.
Ákesi dúkende bolǵan kezde, bala jol jıegine turyp, aýa-raıynyń qolaısyzdyǵyna baılanysty barlyq joldar jabylǵanyn júrgizýshilerge eskertken.
Polıtsııa qyzmetkerleri erikti kómekshini nazardan tys qaldyra almady.
Qaraǵandy oblysy PD Shet aýdany PB bastyǵy Madııar Menisov Aǵzamovtar otbasyna arnaıy barǵan.
Ol Baǵdáýletti ekskýrsııaǵa shaqyryp, balany qyzmettik avtokólikpen Almaty-Ekaterınbýrg jolynda qyzmet atqarǵan patrýlge alyp kelgen, sodan keıin oǵan polıtsııa bólimin kórsetti.
Munda balaǵa estelik syılyqtar tabys etildi.
«Bolashaqta tek sáttilik tileımin! Árıne, seniń polıtseı bolý armanyń júzege asýyna tilektespiz», - dep Shet aýdany PB bastyǵy Baǵdáýletke batasyn berdi.
