Áleýmettik jelilerdiń kóbi qazaq tildi aýdıtorııa úshin yńǵaıly emes - mınıstrlik
«Keıingi jyldary tekserilmegen taýarlardy, qyzmetterdi jáne alaıaqtyq shemalardy jarnamalaǵan qoǵamdyq tulǵalarǵa qatysty oqıǵalar jıilegenin atap ótken jón. Atap aıtqanda, qoǵam, ásirese balalardyń osyndaı aqparattan qorǵalmaýy alańdaýǵa negiz bolyp otyr. Bul rette buzylǵan quqyqtardy qalpyna keltirý maqsatynda paıdalanýshylardyń onlaın platforma ıelerimen ózara is-qımylynyń tıimdi tetikteri joq. El azamattarynyń is júzinde barlyq ótinishteri men shaǵymdary qanaǵattandyrylmaıdy nemese dáleldi jaýap berilmeıdi. Eger bul onlaın platformalar ákimshiligi resmı túrde satatyn jáne tańbalaıtyn jarnama bolmasa, onda qarapaıym azamattarǵa tutynylatyn aqparatty jikteý múmkin emes», - delingen «Ashyq» NQA portalynda jarııalanǵan konsýltatıvtik qujatta.
Aqparat jáne qoǵamdyq damý mınıstrliginiń dereginshe, birqatar elde jarnamalyq kontente tutynýshy quqyǵyn qorǵaýǵa jáne onlaın platformalarda jarnamalyq strategııany tıimdi júrgizýge baǵyttalǵan quqyqtyq algorıtmder bar.
«Keıingi jyldary otandyq kontent tek Qazaqstanda ǵana emes, TMD keńistiginde de tanymal bolǵanyn atap ótý mańyzdy. Degenmen, áleýmettik jelilerdiń qazaq tildi aýdıtorııaǵa yńǵaıly jáne tolyq túsinikti bolýy úshin platformalardy, sondaı-aq mátindik kontentti memlekettik tilge aýdarý júıesin paıdalaný múmkindigi joq», - dep túsindirme berilgen qabyldanýy múmkin zańǵa.
Osyǵan baılanysty vedomsvo ınternettegi jarnama jáne onlaın platformalar týraly jańa zań ázirleýdi usynyp otyr.
