Áleýmettik jelilerdegi aýrý balalarynyń emine kómek suraıtyn habarlamalarǵa monıtorıng júrgiziledi

ASTANA. QazAqparat - QR Prezıdenti janyndaǵy Adam quqyqtary jónindegi komıssııa áleýmettik jelilerdegi aýrý balalaryna járdem surap, kómek tileıtin aqparattarǵa monıtorıng jasaıdy. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıng barysynda Adam quqyqtary jónindegi komıssııa múshesi Tastemir Ábishev málim etti.

«Áleýmettik jelilerdegi aqparattarǵa qarasaq, kóbinese «balamdy emdeýge kómektesińizder», «shetelde ota jasaýǵa kómektesińizder» degen habarlamalar tolyp júr. Bul týraly bizdiń komıssııa biledi. Jalpy osyǵan baılanysty Bala quqyqtary jónindegi komıtet, Adam quqyqtary jónindegi ýákil men Adam quqyqtary jónindegi komıssııa bul aqparattarǵa monıtorıng júrgizýdi bastady», - dedi T.Ábishev.

Bul rette komıssııa múshesi tutastaı alǵanda, aqparattar alý men taratý árkimniń konstıtýtsııalyq quqy ekenin eske sala kele, ony zańmen shekteýge de bolmaıtynyn atap ótti.

«Degenmen, ondaı ata-analar resmı túrde eń aldymen Densaýlyq saqtaý jáne áleýmettik damý mınıstrligine hat joldaýy tıis», - dedi ol.