Áleýmettik jelilerde taraǵan bala urlyǵyna qatysty aqparattar shyndyqqa janaspaıdy - QR ІІM
ASTANA. QazAqparat - Áleýmettik jelilerde bala urlyǵyna qatysty aqparattar shyndyqqa janaspaıdy, dep habarlady QR Іshki ister mınıstrliginiń baspasóz qyzmetinen.
«Áleýmettik jelilerde Qaraǵandy men Almaty qalalaryndaǵy oıyn alańdarynda balalardyń urlaný áreketteri týraly qaýesetterdiń taraýyna, sondaı-aq paıdalanýshylardyń paraqshalarynda kýágerlerdiń sózderi negizinde jasaldy delingen «fotorobottyń» ornalasýyna baılanysty aqparattyń shyndyqqa janaspaıtynyn, atalǵan aqparattyń ishki ister organdary bólinisterinen taralmaǵandyǵyn jáne maqsatty arańdatý áreketi ekendigin habarlaımyz», - delingen habarlamada. Mınıstrliktiń aqparatyna qaraǵanda, jalǵan qaýesetterdiń jarııalanymy men taralý faktisi boıynsha tekserý júrgizilýde. Eldegi qoldanystaǵy zańnamaǵa sáıkes kórineý jalǵan aqparat taratý faktisi úshin qylmystyq jaýapkershilik qarastyrylǵan.
