Áleýmettik jelilerde oqýshylardy esirtki satýǵa shaqyrý kóbeıip barady
ALMATY. QazAqparat - Almatylyq oqýshylarǵa áleýmettik jelilerde «narkokýrer» jumysyna shaqyrý kóbeıip barady. Búgin Almatydaǵy adam quqyǵy bıýrosynyń baspasóz máslıhatynda qoǵamdyq uıymdardyń ókilderi osylaı dep dabyl qaqty, dep habarlaıdy QazAqparat tilshisi.
Osyndaı tuzaqqa birqatar oqýshy túsip qalǵan. Abyroı bolǵanda balalardyń ata-analary birden quqyq qorǵaý organdaryna habarlasqan.
Qylmyskerler balalarǵa narkokýrer qyzmetin usynyp, aptasyna 25 myń teńge tóleımiz dep ýáde bergen.
Ol jalaqyǵa jetý úshin arnaıy tájirıbeden ótý talap etiledi eken.
Sonymen qatar aptasyna 40 tapsyrys jetkizýge tyrysý kerek.
«Kýrerler tekserýden ótedi. Óıtkeni, olarǵa senýge bola ma, joq pa, osy jaǵy tekseriledi. Ol úshin eń aldymen olarǵa esirtkige uqsaıtyn tuz nemese as sodasy beriledi. Eger jasóspirim senimnen shyqsa, aptasyna 40 tapsyrysqa 25 myń teńgemen jumysqa alynady. Kámelettik jasqa tolmaǵandar jeńil esirtki tasymaldasa, kámelettik jasqa tolǵandar aýyr esirtki tasymaldaıdy», - dedi quqyqqorǵaýshy Konstantın Gýdaýskas.
Jumys shemasy boıynsha kýrer ár jerge zatty jasyryp ketýi tıis. Klıent sol jerden alyp ketedi.
Eger tapsyrys berýshi taýardy taba almasa, kýrerge aıyppul salynady.
Esirtki tasymaldaýshylar stýdentter men mektep oqýshylaryn osyndaı jumysqa eki jyldan beri shaqyryp kelgen. Keıin polıtsııa mundaı qylmystyq toptardy áshkerelep, sot bastaldy. Sot aldynda 100-ge tarta adam jaýap berdi. Olardyń 8-i ǵana sottaldy.
Quqyq qorǵaýshy Konstantın Gýdaýskas qalalyq polıtsııanyń áreketsizdik tanytyp otyrǵanyn aıtty.
«Polıtsııa áreket etpeı jatyr. Tipti keıbir tulǵalardyń jazǵan shaǵymyn qabyldamaıdy eken. Sondyqtan, polıtsııanyń ózi osyǵan múddeli me eken degen oı týady», - dedi ol.
Al qalalyq ІІD resmı ókili Saltanat Ázirbek atalǵan aıyptaýlardy joqqa shyǵardy.
«Baspasóz máslıhatynda aıtylǵan keıbir sózderdiń negizsizdigine nazar aýdartamyn. Polıtsııanyń qatysy joqtyǵyna myna nárseler dálel. Osy qylmys shemasyn qalalyq ІІD uıymdasqan qylmysqa qarsy kúres bóliminiń qyzmetkerleri áshkereledi. Málimdeme jasaǵandar naqty san, adam esimderin, ýaqytty, epızodtardy ataǵan joq», - dedi Saltanat Ázirbek.
Sonymen qatar, quqyq qorǵaýshylar ata-analarǵa balalarynyń áleýmettik jelisin baqylap otyrýǵa keńes berdi.
