Áleýmettik jeliden qandaı qaýip kútýge bolady - polıtsııa
Qalalyq ІІD baspasóz qyzmetiniń habarlaýynsha, qazir álemde LinkedIn (Lınked In) áleýmettik jelisinde jalǵan kompanııalardyń alaıaqtyq shemalary týraly aqparat taralyp jatyr.
Tártip saqshylary iri tabys týraly aqparattarǵa senbeýge shaqyrady.
«Lınked In áleýmettik jelisi - iskerlik baǵytta paıdalanylatyn izdeýshi. Kóbinese ony bıznesmender qoldanady. Qazaqstandyqtar arasynda onsha tanymal emes. Sondyqtan, tutynýshylar arasynda oǵan qatysty shaǵym túsken joq», - dedi baspasóz qyzmetinen.
Alaıda quqyq qorǵaýshylar áleýmettik jelide jeke aqparat taratpaýdy eskertedi.
«Beıtanys adamdarǵa jeke málimetterińizdi bermeńiz. Jeke kýálik nómiri, týǵan kún, bank kartasy nómiri, bank shotynyń nómiri degen sııaqty málimetterdi jarııalamańyz. Ǵalamtor arqyly vakansııaǵa ótinish bergende kompanııamen baılanysy joq elektrondy poshtaǵa aqparat jiberýińizdi suraǵan adamdarǵa aqparat jibermeýińiz kerek. Sonymen qatar, olar aýdarmashy, zańger sııaqty mamandardyń qyzmetine aqsha suratýy múmkin. Bul alaıaqtyq shemalardyń belgisi. Elektrondy poshtaǵa kelgen siltemelerdi ashqan kezde abaı bolý kerek. Sol arqyly sizdiń quralyńyzǵa zııandy baǵdarlama ornatylyp, jeke málimetterińizdi jymqyrýy múmkin», - dedi qalalyq ІІD Krımınaldy polıtsııa basqarmasynyń basshysy Esen Ysqaqov.
