Áleýmettik jelidegi vıdeodan keıin Qapshaǵaıdyń ákimi jumystan ketti
TALDYQORǴAN. QazAqparat - Qapshaǵaı qalasynyń ákimi Sátjan Qıqymov jumystan ketti. Bul týraly «QazAqparat» tilshisine Almaty oblystyq ákimdiginiń baspasóz qyzmetinen habarlady.
Eske sala keteıik, buǵan deıin Qapshaǵaı qalasynyń ákimi Sátjan Qıqymovtyń azamattardy qabyldaý barysynda kelýshilerdiń birimen dóreki sóılesken vıdeosy jarııalanǵan edi. Áleýmettik jelide taralǵan beınetaspadan keıin ákim jumystan óz erkimen ketý jóninde ótinish jazǵany aıtylǵan bolatyn.
Sonymen qatar, Qapshaǵaı ákimi Sátjan Qıqymov pen onyń aldyna kelýshilerdiń arasyndaǵy áńgime túsirilgen daýly beınerolık boıynsha tekserý Almaty oblysy ákimdiginiń baqylaýyna alynǵan bolatyn.
«Qapshaǵaı qalasynyń ákimi Sátjan Qıqymovtyń qyzmettik ádep normalaryn buzýyna baılanysty, bul oqıǵa Qazaqstan Respýblıkasy Prezıdentiniń 2015 jylǵy 29 jeltoqsandaǵy №152 Jarlyǵymen bekitilgen memlekettik ákimshilik qyzmetshilerge tártiptik jaza qoldaný erejeleriniń 25-tarmaǵyna sáıkes Almaty oblysy ádep jónindegi keńestiń qaraýyna jiberildi. Ony qaraý nátıjesi týraly qosymsha habarlanady», - delingen aqpar hatta.
