Áleýmettik jelide jıhadqa shaqyratyn óleńdi bólisken aqtóbeliktiń isi sotta qaralýda
AQTÓBE. QazAqparat - Aqtóbede 35 jastaǵy Medet Qoıanbaevtyń isi qaralyp jatyr. Ol Qylmystyq kodekstiń «terrorızmdi nasıhattaý nemese terrorızm aktisin jasaýǵa jarııa túrde shaqyrý» baby boıynsha aıyptalyp jatyr, dep habarlaıdy QazAqparat tilshisi.
Aqtóbe qalalyq sotynda Medet Qoıanbaevtyń isi qaralyp jatyr. 32 jastaǵy aıyptalýshy áleýmettik jeli arqyly adamdardy Sırııaǵa, jıhadqa shaqyratyn óleńdi taratqan. Ol óleń shýmaqtaryn aldymen inisine, keıin tanystaryna jiberdi.
«Qoıanbaev dinı ekstremızm, terrorızmdi nasıhattaıtyn radıkaldy ıdeologııanyń yqpalynda júrip, adamdardyń oı-sanasyn ýlamaq boldy. Ol qarýly jıhadqa shaqyratyn «Vırtýalnaıa Ýmma» atty óleńdi tanystaryna joldady»,- dedi memlekettik aıyptaýshy Dına Baıjanova.
Sot otyrysy kezinde aıyptalýshy óleńdi oqyǵanyn, biraq mazmunyn jete bilmeı taratqanyn jetkizdi.
«Óleńniń alǵashqy joldaryn oqyp, keıin jiberdim. Maǵynasyn tolyqqandy túsingen joqpyn. Negizi Sırııadaǵy halyqtyń jaǵdaıy qıyn dep uqtym. Óleń terrorızmdi nasıhattady dep eseptemedim. Saraptama qorytyndysynan soń bári túsinikti boldy»,- dedi aıyptalýshy Medet Qoıanbaev.
Sot otyrysy kezinde aıyptalýshy óleń oqyǵandy unatanynyn aıtty. Psıhologııalyq-fılologııalyq saraptamanyń qorytyndysy shyǵaryldy. Nátıjesinde óleń shýmaqtarynyń Sırııa eline, jıhadqa shaqyratyny anyqtaldy.
«Materıalda terrorızmdi nasıhattaý belgileri bar. Sonymen qatar, terrorıstik jáne ekstremıstik áreketti uıymdastyrý maqsatynda adamdardy azǵyryp, kóndirý belgileri anyqtaldy»,- dedi saraptama qorytyndysyn oqyǵan sýdıa Erbol Ábdihalyqov.
Aıta keteıik, memlekettik aıyptaýshy Qylmystyq kodekstiń «terrorızmdi nasıhattaý nemese terrorızm aktisin jasaýǵa jarııa túrde shaqyrý» baby boıynsha Medet Qoıanbaevty 5 jylǵa bas bostandyǵynan aıyrýdy surady.
