Áleýmettik jelide jigitpen tanysqan: Semeıde joǵalǵan oqýshy qyz tabyldy
SEMEI. QazAqparat – Semeı qalasynda iz-túzsiz joǵalyp ketken oqýshy qyz basqa qaladan tabyldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetinshe, qyrkúıek aıynyń ortasynda polıtsııaǵa júgingen 49 jastaǵy áıel kámelettik jasqa tolmaǵan qyzynyń joǵalyp ketkenin aıtty. Óz sózinde ol balasynyń eki kún buryn keshki ýaqytta úıden qashyp, sol kúıi habar-osharsyz ketkenin jetkizgen.
«Tártip saqshylary 14 jastaǵy qyzdy tabý úshin jedel-izdestirý sharalaryna kiristi. Sonyń nátıjesinde, jasóspirim Pavlodar qalasynan tabyldy. Belgili bolǵandaı, ol «VKontakte» áleýmettik jelisi arqyly sol jaqta turatyn jigitpen tanysyp, onymen kezdesý úshin úıinen qashqan», - delingen aqparatta.
Qyz tártip saqshylaryna ata-anasymen birge turǵysy kelmeıtinin aıtty. Qazirgi ýaqytta oqýshy Semeı qalasyna jetkizilgen. Jedel ýákilder ony ázirge týystaryna tapsyrdy. Polıtseıler oqıǵanyń mán-jaıyn anyqtaý ústinde.
