Áleýmettik jelide jalǵan málimet taratqan «polıtseıdiń» ústinen tergeý amaldary bastaldy

ASTANA. QazAqparat -  Áleýmettik jelide polıtsııa kıimin kıip, ólip jatqan adamnyń  sýretin salǵan áleýmettik jeli paıdalanýshysynyń ústinen sotqa deıingi tergeý amaldary bastaldy. Bul jaıynda QR ІІM Memlekettik til jáne aqparat departamentiniń dırektory Almas Sadýbaev aıtty, dep habarlaıdy QazAqparat.

«VKontakte» áleýmettik jelisinde «Pavel Egorov» esimdi jeli qoldanýshysynyń polıtsııa formasynda óziniń jáne ustaý barysynda óltirildi delingen bir adamnyń sýretin jarııa etýi áleýmettik jeli paıdalanýshylary arasynda keńinen talqylanýda.  Atalǵan jeli qoldanýshysy ishki ister organdarynyń qyzmetkeri emes. Ol «Qazaqfılm» kıno stýdııasynda polıtseıler týraly fılm túsirgen kompanııanyń kúzetshisi bolyp jumys istegen», -  dedi ol.

 Departament basshysynyń aıtýynsha, akterlerdiń kıimin paıdalanyp, kıno túsirý alańynda polıtsııa formasynda sýretke túsken jáne ony óziniń áleýmettik jelidegi paraqshasynda jarııalaǵan.

«Sýretine «kásibı erekshelik» berý úshin áskerı buıymdar satatyn orynnan ІІM nyshany bar ámııan men kisen satyp alyp, óz atyna tirkelgen gaz tapanshasyn paıdalanǵan jáne ınternetten júktelgen ólgen adamnyń sýretin paıdalanǵan. Qasaqana jalǵan aqparat tartý faktisi boıynsha sotqa deıingi tergeý bastaldy», - dedi Almas Sadýbaev.