Áleýmettik jelide zańsyz kontent taratatyn ınternet resýrsty baıqaǵan jaǵdaıda qaıda habarlasý kerek

ASTANA. QazAqparat – Premer-Mınıstrdiń orynbasary Altaı Kólginov Májilis depýtattarynyń LGT ıdeologııasymen kúres týraly saýalyna bergen jaýabynda áleýmettik jelide zańsyz kontent taratatyn ınternet resýrsty baıqaǵan jaǵdaıda qaıda habarlasý kerektigin aıtty, dep habarlaıdy QazAqparat tilshisi.

«Jyl basynan beri 3491 ınternet-resýrs pen siltemelerge qatysty aqparat salasyndaǵy ýákiletti organnyń 237 nusqamasy negizinde «Baılanys týraly» Zańnyń 41-1-babynda kózdelgen tártippen Qazaqstan Respýblıkasynyń aýmaǵynda baılanys jelileri men quraldarynyń jumysyna qol jetkizýdi shekteý jóninde sharalar qabyldandy. Aqparat jáne qoǵamdyq damý mınıstrligi arqyly habarlama jumysynyń nátıjesi boıynsha 2022 jyly ınternet-resýrstar ákimshilikteri bala quqyqtarynyń buzylýyna 3,1 myńnan astam materıaldardy jarııalanymnan alyp tastady (VKontakte - 2575, Instagram - 9 Facebook - 1, YouTube - 26, Telegram - 536)», - dep jazady vıtse-Premer.

Sondaı-aq, ol jaýabynda ınternet arqyly zııandy kontent taratatyn saıttardyń ústinen kimge shaǵymdanýǵa bolatynyn túsindirgen.

«Áleýmettik jelide topty nemese zańsyz mazmun taratylatyn ınternetresýrsty baıqaǵan jaǵdaıda qogam.gov.kz saıtynyń «Shaǵymdaný» bóligine ótinish qaldyra alady. Kelip túsken barlyq shaǵymdar boıynsha jedel túrde ornalastyrylǵan materıaldarǵa quqyqtyq baǵalaý júrgiziledi, materıaldy buǵattaý nemese joıý jóninde sharalar qabyldanady», - delingen jaýapta.