Áleýmettik jelide sybaılas jemqorlyqpen kúres máselesi kúsheıedi

ASTANA. QazAqparat - Úkimet basshysy Baqytjan Saǵyntaev Aqparat jáne kommýnıkatsııalar mınıstrligine áleýmettik jelide sybaılas jemqorlyqqa qarsy kúres máselesin kúsheıtýdi tapsyrdy, dep habarlaıdy QazAqparat.

«Elbasy Joldaýynda sybaılas jemqorlyqtyń sebebin anyqtap, ony joıýdy, sybaılas jemqorlyqtyń aldyn alý jumystaryn kúsheıtýdi tapsyrdy. Bul jerde negizgi másele - memlekettik satyp alý júıesin jetildirý kerek. Sondyqtan, Qarjy mınıstrligine ortalyqtandyrylǵan qyzmet prıntsıpine súıene otyryp, biryńǵaı memlekettik satyp alý júıesin engizýdi tapsyramyn»,-dedi Saǵyntaev.

Úkimet basshysy sondaı-aq, kvazımemlekettik sektordaǵy memlekettik satyp alý júıesiniń erejelerin qaıta qaraýdy usyndy. Al, Aqparat jáne kommýnıkatsııalar mınıstrligine áleýmettik jelide sybaılas jemqorlyqpen kúres máselesin kúsheıtýdi tapsyrdy.

«Dáýren Áskerbekuly (Aqparat jáne kommýnıkatsııalar mınıstri Dáýren Abaev) Sizge sybaılas jemqorlyqtyń aldyn alý jáne sybaılas jemqorlyqpen kúres máselesin ınternette jáne áleýmettik jelide taratý isin qolǵa alý kerek»,-dedi Premer-mınıstr.

Aıta keteıik, Úkimettiń búgingi otyrysy Memleket basshysy Nursultan Nazarbaevtyń Qazaqstan halqyna arnaǵan kezekti Joldaýyna qatysty boldy.