Áleýmettik jelide svastıkany bólisken qaraǵandylyq jaýapqa tartyldy

QARAǴANDY. QazAqparat - Áleýmettik jelilerge fashıstik svastıkany nasıhattaıtyn sýretter jarııalap, jaǵymsyz habarlamalar arqyly arazdyq týdyrǵan Qaraǵandy qalasynyń turǵynyna 4 jyl 8 aıǵa bas bostandyǵynan shekteý týraly úkim shyǵaryldy, dep habarlaıdy «QazAqparat» HAA.

Tergeý amaldary kórsetkendeı, 38 jastaǵy azamat neoultshyldyqty jaqtap, aınalasyndaǵylarǵa belsendi túrde fashızm ıdeıalaryn sińire bastaǵan. Qaraǵandy qalasy ishki ister departamentiniń qyzmetkerleri, áleýmettik jeli belsendisin qylmystyq jaýapkershilikke tartty.

«Ol óziniń qylmystyq is-áreketin «VKontakte» áleýmettik jelisi arqyly júzege asyryp, ulttyq jáne násildik arazdyq týdyratyn materıaldardy júktep otyrǵan. Sondaı-aq, fashıstik svastıka beınelengen týdy paıdalanǵan», - dep jazylǵan sot úkiminde.

Aıyptalýshy sheteldik ınternet-qaýymdastyqtardyń jarııalanymdarymen birneshe márte bólisken.

Sot 38 jastaǵy azamatty QR Qylmystyq kodeksiniń 174 baby, 1-bóligi boıynsha kináli dep tanyp, 4 jyl, 8 aıǵa bas bostandyǵyn shekteý týraly úkim shyǵardy. Qazirgi ýaqytta quqyqqorǵaý organdary osyǵan uqsas qylmystardyń aldyn alýǵa baılanysty aýqymdy sharýalar atqarý ústinde. Atalmysh qurylym qazir ekstremıstik kontent taratyp júrgen kez-kelgen qoldanýshyny anyqtaı alatyn qurylǵylarmen jabdyqtalǵan.