Áleýmettik jelide Prezıdent fotosy qoldanylǵan feık-aqparat tarady

NUR-SULTAN. QazAqparat – Áleýmettik jelilerde qazaqstandyqtarǵa apta saıyn 125 myń teńge tabys tabýdy usynǵan aqparat taralyp jatyr. Jarnamada QR Prezıdenti Qasym-Jomart Toqaevtyń fotosýreti qoldanylǵan, dep habarlaıdy QazAqparat.

Taratylyp jatqan habarlamada qomaqty tabysty Halyk Bank-ke ınvestıtsııa quıý arqyly tabýǵa bolady-mys.

Stopfake.kz saıty anyqtaǵandaı, Halyk Bank-te aptasyna keminde 125 myń teńge tabys tabýǵa kepildik beretin ınvestıtsııalyq baǵdarlama joq.

«Ózekti salymdar týraly barlyq aqparat banktiń resmı saıtynda jáne áleýmettik jelilerdegi paraqshalarynda kórsetilgen.
Taratylǵan jarnamanyń banktiń resmı paraqshasynda emes, KZ Invest 2022 dep atalatyn akkaýntta jarııalanǵanyna nazar aýdarǵan jón. Mundaı baǵdarlama bankte joq.
Sondaı-aq, el Prezıdenti Qasym-Jomart Toqaev qazaqstandyq bankter óz salymshylaryna apta saıyn 125 myń teńgeden bastap kiristi qamtamasyz ete alady dep málimdegen emes.
Demek, habarlamanyń Halyk Bank-ke de, Memleket basshysyna da qatysy joq. Bul alaıaqtardyń isi jáne oǵan senbegen durys», - delingen saıtta.