Áleýmettik jelide polıtsııa qyzmetkerlerin balaǵattaǵan adam jaýapqa tartyldy
ALMATY. QazAqparat - Almatyda polıtsııa qyzmetkerlerin ashyq túrde qorlaǵan adam jaýapqa tartyldy, dep habarlaıdy QazAqparat tilshisi.
Áleýmettik jelilerge júrgizilgen monıtorıng barysynda er adamnyń polıtsııa qyzmetkerlerin qorlaý faktisi anyqtaldy.
«Ol óziniń Instagram paraqshasynda polıtsııa qyzmetkerlerine arnalǵan bylapyt sózderi bar monologyn jarııalaǵan. Birneshe ret kameraǵa jaǵymsyz sóz aıtqan. Bul jigit QR Qylmystyq kodeksiniń 378-babymen bılik ókilin qorlaǵany úshin jazalanady. Bul fakt sotqa deıingi tergeýdiń biryńǵaı reestrine tirkelgen. Qylmystyq isti PD tergeý basqarmasy júrgizedi. Búgin ol qamaýǵa alynyp, qylmystyq jaýapkershilikke tartyldy», – dedi Almaty qalalyq Polıtsııa departamenti basshysynyń orynbasary Rýstam Abdrahmanov.
Er adam óz áreketi úshin jurttan keshirim surady.
«Men Qazaqstan Respýblıkasynyń barlyq azamattarynan jáne polıtsııa qyzmetkerlerinen keshirim suraımyn. Sizderden meni túsinip, keshirgenderińizdi qalaımyn. Men QR zańnamasynda kórsetilgendeı zań aldynda tolyq jaýap berýge daıynmyn. Keshirińiz, ótinemin», – dedi ol.
