Áleýmettik jelide «Tsesnabankke» qatysty jalǵan aqparat taratqandar anyqtaldy
ASTANA. QazAqparat - Áleýmettik jelide «Tsesnabankke» qatysty jalǵan aqparat taratqandar anyqtaldy. Bul týraly QR ІІM resmı ókili Almas Sadýbaev aıtty, dep habarlaıdy QazAqparat tilshisi.
Onyń aıtýynsha, «Tsesnabank» AQ qarjylyq ahýaly nasharlaǵandyǵy týraly jalǵan aqparat taraǵan. Osyǵan oraı atalǵan qarjy ınstıtýty QR ІІM Tergeý departamentine júginip, QR Qylmystyq kodeksiniń 274 baby boıynsha sotqa deıingi tergeý amaldary júrgizilgen.
«Qabyldanǵan sharalardyń nátıjesinde qasaqana jalǵan aqparat taratýshylar anyqtalyp, olardy ustaý sharalary júrgizilýde. Elimizdiń zańnamasyna sáıkes mundaı sıpattaǵy qylmysty jasaǵany úshin qylmystyq jaýapkershilik qarastyrylǵan», - dedi Almas Sadýbaev.
