Áleýmettik jelide arandatýshylyq sıpatqa ıe sýret taratqan adam qamaýǵa alyndy - Qyzylorda oblysy
QYZYLORDA. QazAqparat - 1 mamyrda áleýmettik jelilerde «Qyzylorda qalasyndaǵy narazylyq aktsııasynda qaıtys boldy» delingen qan josa bolǵan er adamnyń máıitiniń fotosýreti tarap ketti, dep habarlaıdy Qyzylorda oblystyq ІІD baspasóz qyzmeti.
«Oblystyq Іshki ister departamenti atalǵan aqparat shyndyqqa saı kelmeıtinin, jalǵan ári arandatýshylyq sıpatqa ıe ekendigin anyqtady. Sonymen qatar, bul fotosýret ózge memlekette bolǵan oqıǵany beıneleıdi ári Qazaqstan Respýblıkasyna eshqandaı da qatysy joq», delingen habarlamada.
Atalmysh derek boıynsha QR Qylmystyq kodeksiniń 274-babynyń 2-bóliginiń 3-tarmaǵy boıynsha sotqa deıingi tergep-tekserý jumystary bastalǵan.
Jedel-izdestirý jumystary barysynda atalǵan aqparatty Almaty qalasynyń M.Jakaýov esimdi turǵyny taratqany anyqtalyp, azamat Іshki ister departamentine jetkizilip, odan kúdikti retinde jaýap alyndy. Jaýap alý barysynda kúdikti azamat óz kinásin moıyndap otyr.
Sol kúni-aq kúdikti azamat Qylmystyq is júrgizý kodeksiniń 128-babyna sáıkes Qyzylorda qalalyq ІІB Ýaqytsha ustaý abaqtysyna qamaldy. Qazir sotqa deıingi tergep-tekserý jumystary jalǵasýda.
