Áleýmettik jeli paıdalanýshylary Qaraǵandydaǵy jaıaý júrginshini qaǵyp ketken júrgizýshini tabýǵa kómektesti
Qaraǵandy oblysy ishki ister departamenti baspasóz qyzmetiniń basshysy Baqytjan Qudııarovtyń málimdeýinshe, oqıǵa 31 qazan kúni keshkisin Qaraǵandy oblysynyń Shahtınsk kentinde bolǵan.
«Mercedes» kóligin basqarǵan júrgizýshi Jeńiske 40 jyl kóshesinde adam qaqqan. Ol jaıaý júrginshige kómek kórsetpeı, jyldamdyǵyn artyryp, oqıǵa ornynan izin jasyrǵan», - dedi Baqytjan Qudııarov.
Kýágerlerdiń biri qashyp bara jatqan kólikti uıaly telefonyna túsirip úlgergen. Alaıda memlekettik nomeri kórinbegendikten, vıdeo jol-patrýl qyzmetkerlerine kómektese almady. Quqyq buzýshy qoǵamdyq jaǵdaılarǵa nemquraıly qaramaıtyn áleýmettik jeli paıdalanýshylarynyń arqasynda ustaldy.
«Áleýmettik jeli paıdalanýshylarynyń aqparattarynyń arqasynda 22 jastaǵy Shahtınsk kentiniń turǵyny ustaldy. Ol jol júrý erejesin buzǵanyn moıyndady», - dedi ishki ister departamenti baspasóz qyzmetiniń basshysy.
Jergilikti polıtsııa qyzmeti oqıǵa kýágerlerine kórsetken kómekteri úshin alǵys bildiredi.